Տաշիր քաղաքի Արցախ փողոցի 51 հասեցում՝ հյուրասենյակի հատակին, պատերին եւ առաստաղին հուլիսի 3-ին հայտնաբերվել են բեկորային հետքեր եւ բեկորներ, ինչպես նաեւ հատակին գտնվող գորգի վրա` արնանման զանգվածի հետքեր, իսկ բնակիչ 51-ամյա Վարդան Մ.-ն անգիտակից վիճակում տեղափոխվել է հիվանդանոց: NEWS.am-ի տեղեկություններով՝ Վարդան Մ.-ն ՌԴ քաղաքացի է, հենց դեպքի օրն է վերադարձել Հայաստան եւ փորձանք է եկել գլխին:
Նա պատմել է, որ Արցախի 51 հասցեում ապրել են իր հանգուցյալ ծնողները, ինքն էլ տանը կից ավտոտնակում մուրճ փնտրելու ընթացքում այնտեղ գտնվող պահարանի միջից գտել է պոլիէթիլենային տոպրակ, որի մեջ եղել է ձեռքի նռնակ: Տղամարդը այն տեղափոխել է տան հյուրասենյակ, փորձել անվտանգ վնասազերծել, որպեսզի հանձնի իրավապահներին, սակայն նռնակը պայթել է եւ իրեն պատճառել բեկորային վնասվածքներ: Պարզվել է, որ նռնակը պատկանել է նրա հանգուցյալ հորը, իսկ վերջինս այն ձեռք էր բերել 1993-1994 թվականների ընթացքում ԼՂՀ-ից: Նշենք, որ Վարդան Մ.-ն 1996թ-ից մշտապես բնակվում է ՌԴ Նովոսիբիրսկի մարզի Օբ քաղաքում: Քննչական բաժնում քննություն է ընթանում: