Երեւանի Քանաքեռ-Զեյթուն թաղամասում այսօր` հուլիսի 4-ին, դանակի հարվածներով կնոջը սպանելու մեջ կասկածվող 42-ամյա Վահան Կ.-ի վարքի մեջ հարեւանները նախկինում որեւէ տարօրինակ բան չեն նկատել, չեն լսել, որ նա կրոնական որեւէ հավաքի մասնակցի:
Հարեւանները, որոնք կատարվածից զարմացած էին, NEWS.am-ի հետ զրույցում պատմեցին, որ Վահան Կ.-ն տաքսու վարորդ էր աշխատում, իսկ կինն էլ կարի ֆաբրիկայում էր աշխատում:
«Վահանը շատ հոգատար հայր էր, նույնիսկ կնոջը եւ աղջիկներին մեքենայով էր տանում գործի եւ դասի: Երբեւէ կռիվ կամ որեւէ տարօրինակ բան չենք նկատել, չգիտենք` ինչու է նման բան արել»,-ասաց հարեւաններից մեկը` նշելով, որ ընտանիքը հիմնականում հարեւանների հետ չէր շփվում:
Հարեւանները պատմեցին, որ Վահանը նախորդ տարի ընտանիքին ծովափնյա հանգստի է մեքենայով տարել:
Ամուսինները երկու դուստր ունեն, որոնցից մեկն ուսանող է, մյուսը դպրոցական:
Ավելի վաղ NEWS.am-ը հաղորդել էր, որ Քանաքեռ 14 փողոցի 24/1 տանը հայտնաբերել է 38-ամյա կնոջ դի:
Հայկանուշ Սորսումաթյանի դին հայտնաբերվել է կրծքավանդակի մասում սուր կտրող-ծակող առարկայից ստացած վնասվածքով: Դեպքի առթիվ հարուցվել քրեական գործ՝ ՔՕ-ի 104-րդ հոդվածի հատկանիշներով, սպանության կասկածանքով ձերբակալվել է կնոջ ամուսինը:
Shamshyan.com-ի տեղեկություններով՝ երբ իրավապահները ժամանել են դեպքի վայր, բազմոցին դրված է եղել նաեւ Աստվածաշունչ, իսկ ամուսինը պատմել է, որ կնոջը սպանելուց ժամեր առաջ իր 2 աղջիկներին տարել է եկեղեցի՝ պատճառաբանելով, որ «նրանց միջից մաքրելու է չարը», այնուհետեւ վերադարձել է տուն, կնոջը նստեցրել բազմոցին ու հրամայել, որ ձեռքը դնի Աստվածաշնչին, քանի որ «նրա միջից էլ էր ուզում չարը դուրս հանել»: