Ի տարբերություն Ադրբեջանի՝ մենք բախումներ չենք հրահրում, մենք ցանկանում ենք խաղաղ ճանապարհով խնդրի կարգավորում: Այս մասին իտալական IlGiornale.it կայքի հետ հարցազրույցում ասել է Լեռնային Ղարաբաղի Հանրապետության արտգործնախարար Կարեն Միրզոյանը:
Անդրադառնալով ԼՂ բանակցային գործընթացին եւ ԵԱՀԿ Մինսկի խմբի գործունեությանը, նա նշել է. «Մեր հիմնական նպատակն է կարգավորել Ադրբեջանի հետ հակամարտությունը: Մինչ այժմ դժբախտաբար դրական արդյունք չունենք: Շատերը քննադատում են ԵԱՀԿ Մինսկի խմբին՝ պնդելով, որ դեռ չի հաջողվել լուծել հակամարտությունը: ԼՂ կառավարությունը չի կիսում Մինսկի խմբի համանախագահների (ԱՄՆ, Ֆրանսիա և Ռուսաստանի Դաշնություն) աշխատանքի վերաբերյալ քննադատությունը: Բանն այն է, որ Ադրբեջանը ցանկանում է սրել իրավիճակը: Մենք մշտապես բախվում ենք սահմանին դիպուկահարների առկայությանը, և հայերի դեմ քարոզչությունը դառնում է Ադրբեջանի ներքին քաղաքականության մեխը: Կարծում եմ՝ Մինսկի խումբը պետք է պահանջի Ադրբեջանից փոխվստահության մթնոլորտի ստեղծմանն ուղղված քայլերի իրականացում»:
ԼՂՀ ԱԳ նախարարը նշել է, որ Արցախը ցանակում է վերադառնալ Ադրբեջանի հետ անմիջական բանակցությունների, հիշեցնելով, որ հակամարտության սկզբում շատ անմիջական շփումներ կային: «Հրադադարը, որը պահպանվում է մինչև հիմա, այդպես է ձեռք բերվել: Ցանկացած լուծում, այնուամենայնիվ, պետք է հաշվի առնի երկրում իրականությունը: Ավելի քան 20 տարի է անցել պատերազմի ավարտից հետո: Շատ երիտասարդներ են ծնվել եւ չի կարելի արհամարհել նրանց կարծիքը, որոնք ավելի շատ ազատություն են ցանկանում և վստահաբար չէին ցանկանա հայտնվել բռնապետական երկրում, որտեղ հակահայկականություն է քարոզվում»,-ասել է նախարարը:
Հարցին, թե արդյոք Ադրբեջանը փորձու՞մ է ինչ-որ միջադեպ ստեղծել պատերազմը վերսկսելու համար, Կարեն Միրզոյանը պատասխանել է. «Ամեն անգամ, երբ բանակցությունների հերթական փուլ է սպասվում, կարելի է վստահ լինել, որ Ադրբեջանը կփորձի շփման գծի երկայնքով հարձակումներ իրականացնել՝ ցույց տալու համար, որ չկա այլ լուծում, քան նոր պատերազմը: Պպատերազմը կործանարար է բոլորի համար, անգամ նրա համար, ով հաղթում է այն: Այնպես որ ի տարբերություն Ադրբեջանի՝ մենք բախումներ չենք հրահրում: Մենք ցանկանում ենք խաղաղ ճանապարհով խնդրի կարգավորում»:
