Կանադական Սասկաչեւան շրջանում անտառային հրդեհների պատճառով շուրջ 8 հազար մարդ է տարհանվել: Այս մասին հաղորդում է CBC հեռուստաալիքը:
5 հազար տարհանվածների կտեղավորեն Քոլդ-Լեյք քաղաքի (Ալբերտա նահանգ) ապաստարանում: Սասկաչեւանի վարչապետ Բրեդ Ուոլը տեղեկացրել է, որ, հնարավոր է, զինծառայողների օգնության կարիք լինի, հատկապես զանգվածային տարհանումը համակարգելու հարցում:
LENTA-ի փոխանցմամբ, Մոնրեալ-Լեյք շրջանում արտակարգ դրություն է հայտարարվել: Հրդեհների ընդհանուր թիվը հասել է 114-ի:
Կանադայի Անտառների պահպանության ծառայության տվյալներով, հողատարածքների ընդհանուր մակերեսը, որտեղ ամեն տարի հրդեհներ են բռնկվում, միջինը կազմում է 1.6 մլն հեկտար:
