Այս պահին, Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարան են բերվել Սյունիքի մարզպետ Սուրիկ Խաչատրյանի դեմ մահափորձի գործով 4 ձերբակալվածներին: Այդ 4 անձինք են Կապան քաղաքի բնակիչներ Գարեն Ռոմիկի Աթաջանյանը, Հենրիկ Շահենի Ավագյանը եւ Գորիս քաղաքի բնակիչներ Վիտալի Վլադիմիրի Մինասյանը եւ Արա Էմիլի Բուդաղյանը:
Հայաստանի Ազգային անվտանգության ծառայության քննչական գլխավոր վարչությունը դիմել է նշված դատարան, որպեսզի դատարանը որպես խափանման միջոց նրանց նկատմամբ կիրառի երկամսյա կալանք:
Այս պահին նշված դատարանի դատավոր Գագիկ Պողոսյանի նախագահությամբ ընթանում է դռնփակ դատական նիստը:
Արա Բուդաղյանի փաստաբան Հայկ Ալումյանը NEWS.am-ի թղթակցի հետ զրույցում նշեց, որ այս պահին դեռ դատական նիտերը չեն ավարտվել եւ հայտնի չէ, թե որքան այն կտեւի:
Ավելի վաղ հայտնել էինք, որ Սյունիքի մարզպետ Սուրիկ Խաչատրյանի եւ նրա ուղեկիցների նկատմամբ 2015թ. մայիսի 20-ին ժամը 18:15-ի սահմաններում հրազենի գործադրմամբ սպանության փորձ կատարելու դեպքի առթիվ իրականացվող նախաքննության ընթացքում ՀՀ ԱԱԾ մարմինների կողմից ձեռնարկված օպերատիվ-քննչական գործողությունների արդյունքում, նշված հանցագործությանն առնչակից լինելու կասկածանքով, հուլիսի 3-ին, ձերբակալվել են ՀՀ Սյունիքի մարզի Կապան քաղաքի բնակիչներ՝ Գարեն Ռոմիկի Աթաջանյանը, Հենրիկ Շահենի Ավագյանը եւ Գորիս քաղաքի բնակիչներ՝ Վիտալի Վլադիմիրի Մինասյանը եւ Արա Էմիլի Բուդաղյանը:
Մասնավորապես, Արա Բուդաղյանը կասկածվում է սպանությանը դրդելու մեջ:
