Հիմնադիր խորհրդարանի քարտուղարությանը լուրեր են հասնում, որ ռեժիմը փորձ է անելու Մարշալ Բաղրամյան պողոտայում սադրիչ քայլեր կատարել՝ հետագայում դրանք Ժիրայր Սէֆիլյանին ու նրա ընկերներին վերագրելու եւ նրանց դեմ նոր հալածանք սկսելու նպատակով: Այս մասին հաղորդագրություն է տարածել Հիմնադիր խորհրդարանի քարտուղարությունը:
Հայտարարությունում նաեւ ասվում է.
«Ըստ այդ լուրերի, նման փորձ կատարվելու է այսօր՝ հուլիսի 5-ի, երեկոյան: Մարշալ Բաղրամյան պողոտայում հավաքվող մեր ժողովրդին կոչ ենք անում զգոն լինել, տարբերել հակառակորդին յուրայինից եւ կանխել սադրանքի որեւէ փորձ:
Հիմնադիր խորհրդարանի քարտուղարությունը դիմում է նաեւ Հայաստանի Հանրապետությունում հավատարմագրված օտարերկրյա պետությունների եւ միջազգային կազմակերպությունների դիվանագիտական ներկայացուցչություններին, ինչպես նաեւ միջազգային եւ հայաստանյան իրավապաշտպան կազմակերպություններին՝ կոչ անելով ճշտել Ժիրայր Սէֆիլյանի եւ նրա ընկերների նկատմամբ նախապատրաստվող նոր հալածանքի վերաբերյալ շրջանառվող տեղեկությունները եւ, անհրաժեշտության դեպքում՝ իրենց առաքելությանը համապատասխան միջոցներ ձեռնարկել այն կանխելու ուղղությամբ»: