Համաշխարհային ֆոնդային բորսաներում եվրոյի փոխարժեքը իենի եւ դոլարի հանդեպ նվազել է Հունաստանում տեղի ունեցած հանրաքվեի նախնական արդյունքների հրապարակումից հետո։
Ֆինանսիստները նշում են, որ հունական բանկերը մոտ են կաթվածահար լինելուն։
Եթե դա տեղի ունենա, միլիոնավոր հույներ կզրկվեն իրենց խնայողություններից, ընկերությունները կսնանկանան, երկրում կարող են պակասել սննդի եւ դեղամիջոցների պաշարները։
Հունաստանի բանկերին հուսալի վարկատու է անհրաժեշտ, սակայն Եվրոպական կենտրոնական բանկը հնարավոր է չվերցնի իր վրա այդ բեռը եւս մեկ անգամ, փոխանցում է BBC-ի Ռուսական ծառայությունը։
Եվրահանձնաժողովը, ԱՄՀ-ն եւ ԵԿԲ-ն Հունաստանի գլխավոր վարկատուներն են, որոնք Աթենքից պահանջում են նոր վարկի դիմաց բարձրացնել հարկերն ու անցնել կոշտ տնտեսման քաղաքականության։ Սակայն հուլիսի 5-ին կայացած հանրաքվեի ժամանակ հույների ավելի քան 60 տոկոսը դեմ քվեարկեց այդ առաջարկին։
