Վրաստանի մայրաքաղաք Թբիլիսիում փլուզվել է կիրառական մաթեմատիկայի եւ ֆիզիկայի ինստիտուտի շինության մի մասը։ Փլուզումը տեղի է ունեցել երկուշաբթի՝ ապամոնտաժման աշխատանքների ժամանակ։ Փլատակների տակ 4 մարդ է մնացել։ Նրանցից մեկին հաջողվել է փրկել։ Ինչպես տեղեկացնում է Արտակարգ իրավիճակների գործակալությունը, մնացած 3-ը զոհվել են։

Դեպքի վայր են ժամանել փրկարարները եւ շտապ օգնությունը, փոխանցում է «Գրուզիա Օնլայն»-ը։

Շենքը, որի մի մասը փլուզվել էր, պետք է վերակառուցվեր եւ բարձրանար մի քանի հարկով։ Լրատվամիջոցները հայտնում են, որ բանվորներն աշխատել են 24-ժամյա ռեժիմով։