Ցուցարարները չեն պատրաստվում կատարել ոստիկանության պահանջը եւ հեռանալ Բաղրամյան պողոտայից: Այս մասին այսօր՝ հուլիսի 6-ին Բաղրամյան պողոտայում հայտարարեց ցուցարարներից Դավիթ Սանասարյանը, ով նախաձեռնող խմբի անդամ է (ֆոտոռեպորտաժ):
Դավիթ Սանասարյանը Հունան Պողոսյանից մինչեւ երեկո ժամանակ խնդրեց՝ ասելով, որ ցուցարարների թիվն այս պահին սակավ է, եւ այդքանով բոլորի փոխարեն որոշում կայացնել չեն կարող: Դավիթ Սանասարյանը եւ Հունան Պողոսյանը միմյանց մեղադրեցին սադրանքների մեջ:
Վալերի Օսիպյանը Դավիթ Սանասարյանին ասաց, որ Բաղրամյան պողոտայում ինչ-որ բան կատարվի ամբողջ պատասխանատվությունն ընկնելու է Դավիթ Սանասարյանի վրա:
Վալերի Օսիպյանն առաջարկեց ակցիան տեղափոխել Ազատության հրապարակ կամ մեկ այլ վայր, որտեղ ակցիան անցկացնելու դեպքում երթեւեկությունը չի խաթարվի:
Այս պահին ցուցարարները նստել են Բաղրամյան պողոտայում՝ ոստիկանական պատի առջեւ: Նրանք հաստ թելեր են կապում փողոցի լայնքով ոստիկանության հնարավոր գործողություններից պաշտպանվելու նպատակով:
Ցուցարարները ազգագրական երգեր են երգում:
Ցուցարարների թիվն այս պահին մի քանի տասնյակ է: Բաղրամյան պողոտայում են նաեւ ԱԺ պատգամավոր Նիկոլ Փաշինյանը (ՀԱԿ), Էլինար Վարդանյանը (ԲՀԿ), Վահե Էնֆիաջյանը (ԲՀԿ) եւ սցենարիստ Սուրեն Շահվեդրյանը:
Հիշեցնենք, որ ոստիկանությունը հայտարարություն է տարածել, որ պատրաստվում է այսօր բացել Բաղրամյան պողոտան: Հայտարարությունում ցուցարարներին ժամանակ է տրված մինչեւ 12.30-ը ինքնուրույն բացել պողոտան: