Հատուկ միջոցներ եւ ուժ ոստիկանությունը չի կիրառելու: Այս մասին այսօր՝ հուլիսի 6-ին, Բաղրամյան պողոտայում հայտարարեց ՀՀ փոխոստիկանապետ Հունան Պողոսյանը՝ հորդորելով միասին բացել պողոտան (ֆոտոռեպորտաժ):
«Ակցիան չի կարող բացարձակ լինել: Այն կարող է սահմանափակվել ի շահ հասարակության»,-ասաց նա:
Հարցին, թե այսօր ամեն գնով ոստիկանությունը կբացի՞ պողոտան, Հունան Պողոսյանը հստակ պատասխան չտվեց՝ նշելով. «Պիտի փորձենք բացել: Մենք հորդորում ենք չխանգարել մեզ: Ոստիկանությունը փոխըմբռնման պայմաններում հույս ունի, որ կհասկանան: Հատուկ միջոցներ եւ ուժ չի կիրառվելու, խնդրում եմ, որ նրանց կողմից էլ լինի նման երաշխավորություն: Բայց այն կողմից ոչ ոք դա չի երաշխավորում:
Նորից եմ ասում, հատուկ միջոցներ չենք կիրառելու, մտնելու ենք իրենց ձեռքը եւ միասին գնանք»,-ասաց նա:
Դիտարկմանը, թե եթե ցուցարարները հրաժարվեն հեռանալ ինչ պիտի անի ոստիկանությունը, ծեծի՞ է ենթարկելու, Հունան Պողոսյանը պատասխանեց. «Ծեծի չենք ենթարկի, կվնասազերծենք, բերման կենթարկենք»:
«Առաջին օրը Դավիթ Սանասարյանը հայտարարում էր, որ ինքը սովորական քաղաքացի է, երկրորդ իրը՝ կազմակերպիչ, երրորդ օրը՝ տիեզերագնաց: Այդպես չի լինում, մեկը պետք է իր վրա պատասխանատվություն վերցնի բանակցի: Մենք հորդորում ենք ազատել պողոտան: Կոչ ենք անում երթեւեկելի մասն ազատել»,-նշեց Հունան Պողոսյանը:
Երեւանի փոխոստիկանապետ Վալերի Օսիպյանն էլ նկատեց, որ ոստիկանների մոտ անգամ մահակներ չկան: «Առօրյայում պարեկային ծառայությունը պետք է կրի մահակներ, բայց անգամ դա չկա հիմա»,-ասաց նա:
«Դավիթ ջան, ձեզ հորդորում եմ վերականգնել Բաղրամյանի բարի տեսքը, որն ունեցել է միշտ: Օրինականացրեք ձեր հավաքը, ստացեք թույլտվություն»,- դիմելով նախաձեռնող խմբի անդամ Դավիթ Սանասարյանին, ասաց Օսիպյանը:
Հիշեցնենք, որ ոստիկանությունը հայտարարություն է տարածել, որ պատրաստվում է այսօր բացել Բաղրամյան պողոտան: Հայտարարությունում ցուցարարներին ժամանակ է տրված մինչեւ 12.30-ը ինքնուրույն բացել պողոտան:
Ոստիկաններն արդեն հեռացրել են բարիկադի դեր կատարող աղբամանները: Ցուցարարները այդ գործընթացին չեն խոչընդոտել: Նրանք նստել են փողոցում եւ հրաժարվում են հեռանալ: