Բաղրամյան պողոտայում այս պահին լարված իրավիճակ է ոստիկանները բերման են ենթարկում Բաղրամյան պողոտայում արդեն 14 օր նստացույց անող ցուցարարներին: Նրանք սկզբում ցուցարարների ձեռքից ուժով խլեցին պարանները, որոնք նրանք կապել էին ոստիկանությունից տարանջատվելու համար, հետո սկսեցին հրլով եւ ուժ կիրառելով ցրել նրանց: Ոստիկանությունն սկսել է բերման ենթարկել ցուցարարներից մի քանիսին (ֆոտոռեպորտաժ):
Ոստիկանների թիվը մի քանի անգամ ավելացել է, նրանք պատ են կազմել Բաղրամյան պողոտայի մայթեզրերի երկայնքով:
Հունան Պողոսյանը վստահեցնում է, որ առանց ուժի կիրառման են ցուցարարներին հեռացնում: Նա բերման ենթարկելու մեքենայից իջեցրեց ցուցարար աղջիկներից մեկին: ՀՀ փոխոստիկանապետը նշել է, որ ցուցարարներին բերման են ենթարկել, քանի որ վերջինները չէին հեռանում Բաղրամյան պողոտայից:
Նա այս անգամ եւս բողոքել է լրագրողներից՝ նշելով, որ լրագրողները կրկին իրենց բարձրության վրա չեն:
ԲՀԿ խմբակցության ղեկավար Նաիրա Զոհրաբյանի հարցին, թե բերման ենթարկվածներին 3 ժամ անց ազա՞տ են արձակելու, Պողոսյանը պատասխանեց. «Բացառված է ուժի կիրառումը: Եթե վարչական իրավախախտումների ընթացակարգերով է՝ բնականաբար, իսկ եթե քրեական գործ կլինի՝ այլ ընթացք կստանա: Կարծում եմ՝ երեք ժամ հետո բոլորին բաց կթողնեն»:
Հիշեցնենք, որ ոստիկանությունն այսօր՝ հուլիսի 6-ին, հայտարարություն էր տարածել, որ պատրաստվում է այսօր բացել Բաղրամյան պողոտան: Հայտարարությունում ցուցարարներին ժամանակ է տրված մինչեւ 12.30-ը ինքնուրույն բացել պողոտան: