Բաքվում Եվրոպական խաղեր անցկացնելը չտվեց այն արդյունքը, որը սպասում էին ադրբեջանական իշխանությունները։ Այս մասին հուլիսի 6-ին կայացած մամուլի ասուլիսի ժամանակ հայտարարեց ադրբեջանագետ Սարգիս Ասատրյանը։
Նրա խոսքով՝ Ադրբեջանի իշխանությունները բավական մեծ գումար էին ծախսել Եվրոպական խաղերը կազմակերպելու եւ անցկացնելու համար։ «Եվ հետաքրքիր էր նախքան խաղերի մեկնարկը սոցցանցերում հետեւել ադրբեջանցի օգտատերերի արձագանքին։ Շատերը բողոքում էին կատարված ծախսերից, իսկ միջազգային այն արձագանքը, որը սպասում էին ադրբեջանական իշխանությունները չեղավ։ Անգամ կարծիք հնչեց, թե Երեւանի ցույցերը իրենց ստվեր տակ թողեցին Բաքվի Եվրոպական խաղերը»,-նշեց մասնագետը։
Մասնագետի կարծիքով Եվրոպական խաղերի կազմակերպման գործընթացը ավելի խստացրեց Ադրբեջանի հասցեին հնչող քննադատությունը։ «Բայց քննադատության ալիքը չի նշանակում, որ Ադրբեջանը մեկուսացման մեջ է հայտնվել եւ Արեւմուտքի կողմից ընկալվում է որպես բռնապետություն։ Ադրբեջանը Արեւմուտքի համար շատ կարեւոր գործընկեր է, եւ մարդու իրավունքները Ադրբեջանի վրա ազդելու շատ կարեւոր լծակ է զիջումներ ստանալու համար»,- եզրափակեց Սարգիս Ասատրյանը։