Քաղաքական վերլուծաբան Արգիշտի Կիվիրյանն այսօր՝ հունիսի 6-ին, Բաղրամյան պողոտայի երրթեւեկությունը վերականգնելուց հետո, որպես բողոքի նշան կանգնեց Բաղրամյան պողոտայի մեջտեղում, սակայն ոստիկանները նրան հեռացրին այդտեղից:
Լրագրողների հետ զրույցում Կիվիրյանը նշեց, որ ՀՀ Սահմանադրությամբ տրված է իրավունք իրականացնել խաղաղ բողոքի ակցիա, սակայն ոստիկանները թույլ չեն տալիս իրեն դա անել, ասելով, որ իրավունք չունի եւ բերման կենթարկեն:
«Ես շարունակում եմ իմ բողոքի ակցիան, որի իրավունքն ունեմ: Ոստիկաններն ինձ սպառնում են, որ բերման կենթարկեն, նրանք խոչընդոտում են այն»,-ասաց նա:
ՀՀ փոխոստիկանապետ Հունան Պողոսյանը դիմելով Կիվիրյանին՝ ասաց. «Մի խախտեք հասարակական կարգը: Կանեք՝ համապատասխան կարգով բերման կենթարկվեք», ինչին վերջինս արձագանքեց. «Մի սպառնացեք ձեր բերման ենթարկելով»:
Ի վերջո, ոստիկանները բերման ենթարկեցին Արգիշտի Կիվիրյանին: