Էլեկտրաէներգիայի սակագնի բարձրացման դեմ պայքարող քաղաքացիներն այսօր՝ հուլիսի 6-ին՝ ժամը 19։00-ին, հավաք են հրավիրում Ազատության հրապարակում։ Այս մասին NEWS.am-ի թղթակցի հետ զրույցում ասաց ցուցարարներից Արմեն Մկրտչյանը, ով նաեւ «Հայազն» կուսակցության անդամ է։
«Արդեն արժանապատվության հարցն է խոսում: Մենք կսպասենք մեր ընկերներն եւ նրանց հետ կորոշենք մեր հետագա անելիքը։ Կոչ ենք անում քաղաքացիներին, որ գան ու կանգնեն այն 50 հոգու կողքին, ովքեր պայքարում են իրենց համար»,- ասաց Մկրտչյանը՝ նշելով, որ ժամը 19։00-ին իրենք հանրային քննարկում են նախատեսում։
Հիշեցնենք, որ ոստիկանությունն այսօր՝ հուլիսի 6-ին, հայտարարություն էր տարածել, որ պատրաստվում է այսօր բացել Բաղրամյան պողոտան: Ցուցարարներին ժամանակ էր տրվել մինչեւ 12:30-ը ինքնուրույն բացել պողոտան: Չնայած ոստիկանության հորդորներին՝ ցուցարարները նստել էին փողոցում եւ շարունակում էին նստացույցը: Ոստիկանական ուժերի թիվը Բաղրամյան պողոտայում 13:00-ի սահմանում կտրուկ ավելացավ, նրանք պողոտայում նստած ցուցարարների մեծ մասին ոտքերից բռնած, գրկած վիճակում բերման ենթարկեցին, մյուս մասին շղթա կազմած հեռացրին դեպի մայթ: Գործողության ընթացքում բերման ենթարկվեց 46 քաղաքացի, որոնք բոլորն էլ արդեն ազատ են արձակվել:
Այս պահին Բաղրամյան պողոտան բաց է, երթեւեկությունը վերականգնվել է: