Հայաստանում «Իսկանդերներ» տեղակայելու նպատակը Հարավային Կովկասում Ռուսաստանի դաշնակցի անվտանգության ապահովումն է։ Այս մասին haqqin.az-ին հայտարարել է ՌԴ քաղաքական եւ ռազմական ինստիտուտի վերլուծական բաժնի ղեկավար Ալեքսանդր Խրամչիխինը։
«Նպատակն անվտանգության ապահովումն է, իսկ թե որ կողմից, դա երկրորդական հարց է։ Հրթիռի վրա հո գրված չէ, թե ում դեմ է այն ուղղված՝ Թուրքիայի, Ադրբեջանի, թե՞ ԻՊ գրոհայինների։ Հրթիռները ուղղված են լինելու Հայաստանի ցանկացած թշնամու դեմ, այդ թվում՝ Ադրբեջանի։ Ի միջի այլոց Վրաստանը նույնպես այդ ցուցակում է, քանի որ այդ հանրապետությունը Ռուսաստանի հակառակորդն է եւ կարող է խոչընդոտել ռազմական տեխնիկան Հայաստան տեղափոխելուն»,- հայտարարել է ռուս ռազմական փորձագետը։
Նա նաեւ հիշեցրել է, որ Ադրբեջանը ժամանակին Ռուսաստանից գնել է Ս-300 ՊՄՈՒ-2 տեսակի 3 դիվիզիոն, որոնք կարող են պաշտպանել «Իսկանդերների» հարձակումներից։
«Այստեղ պետք է մի կարեւոր մանրուք հասկանանք։ Ամեն բան կախված կլինի իրավիճակի մարտավարության հաշվարկների նախապատրաստումից։ Եթե «Իսկանդերը» գործի դնեն հանկարծակի, ապա Ս-300 ՊՄՈՒ-2-ն չի հասցնի արձագանքել. այն ուղղակի չեն հասցնի միացնել։ Եթե պատերազմն արդեն ընթանում է, եւ դիվիզիոնները մարտական վիճակի են բերվել, ապա «Իսկանդերի» հարվածը կարելի է հետ մղել։
Ի միջի այլոց, ՆԱՏՕ-ն դժվար թե ձեզ օգնի։ Նախ Ադրբեջանին ՆԱՏՕ չեն ընդունի։ Դա բոլորն են հասկանում։ Եվ հետո, ՆԱՏՕ-ի անդամ լինելը չի բարձրացնում ինչ-որ մեկի անվտանգությունը։ Ենթադրենք, Ադրբեջանը դարձավ ՆԱՏՕ-ի անդամ, մի՞թե դա երաշխավորում է, որ «Իսկանդերը» չի ընկնի Բաքվի վրա»,-ընդգծել է Խրամչիխինը։
