Հայոց ցեղասպանության ճանաչումը կարեւոր է ոչ միայն Հայաստանի, հայ ժողովրդի, այլեւ՝ միջազգային հանրության համար՝ կանխարգելելու մարդկության դեմ նոր հանցագործությունները, նոր ցեղասպանությունները: Այդ մասին ասել է Հայաստանի արտգործնախարար Էդվարդ Նալբանդյանը բրազիլական «Էստադաո» թերթին տված հարցազրույցում։
Ըստ ԱԳ նախարարի, սա է պատճառը, որ Հայոց ցեղասպանության, ինչպես նաեւ այլ ցեղասպանությունների ճանաչումն ու դատապարտումը չափազանց կարեւոր է: Թերեւս հնարավոր կլիներ կանխել մարդկության դեմ իրականացված նման այլ հանցագործությունները, եթե հարյուր տարի առաջ Հայոց ցեղասպանությունը պատշաճ կերպով ճանաչվեր եւ դատապարտվեր:
Հարցին, թե ինչին մենք ականատես ենք մեր օրերում, հնարավոր էր խուսափել, Նալբանդյանը պատասխանել է. «Կարծում եմ՝ այո: Հայոց ցեղասպանությունից հետո աշխարհն ականատես եղավ Շոային, Ռուանդայում, Կամբոջայում, Դարֆուրում եւ այլ վայրերում իրականացված ցեղասպանությունների: Միջազգային հանրությունը պետք է միավորի ջանքերը` մարդկության դեմ նոր հանցագործությունների կանխարգելման նպատակով: Մարտի 27-ին Ժնեւում ՄԱԿ-ի Մարդու իրավունքների խորհրդում ընդունվեց Հայաստանի նախաձեռնած՝ Ցեղասպանության կանխարգելման վերաբերյալ բանաձեւ, որը համահեղինակեցին 72 պետություն, այդ թվում նաեւ` Բրազիլիան: Բանաձեւն ընդունվեց կոնսենսուսով: Գրեթե յուրաքանչյուր երկու տարին մեկ մենք նախաձեռնում ենք նմանատիպ բանաձեւ` նպատակ ունենալով կատարելագործելու կանխարգելման տարբեր մեխանիզմները: Կարեւոր է, որ բանաձեւն ընդունվեց Հայոց ցեղասպանության 100-րդ տարելիցի ոգեկոչման նախօրեին»:
«Այս ապրիլին Եվրոպական խորհրդարանը Հայոց ցեղասպանության 100-րդ տարելիցի կապակցությամբ ընդունեց հատուկ բանաձեւ` հստակ ուղերձով: Սա առաջին դեպքը չէ, երբ Եվրոպական խորհրդարանը ճանաչում է այն, սակայն նոր բանաձեւը պարունակում է հստակ եւ պարզ ուղերձ Թուրքիային` առերեսվելու սեփական անցյալի հետ, ճանաչելու Հայոց ցեղասպանությունը եւ, այդպիսով, ճանապարհ հարթելու հայ եւ թուրք ժողովուրդների միջեւ իրական հաշտեցման համար:
Շատ կարեւոր է, որ նորանոր երկրներ են ճանաչում Հայոց ցեղասպանությունը։ Կցանկանայի հատուկ մատնանշել Գերմանիայի եւ Ավստրիայի կողմից իրականացված քայլերը. առաջինը՝ նախագահի, իսկ մյուսը՝ խորհրդարանի մակարդակներով։ Նկատի ունեմ Գերմանիայի Նախագահի եւ Ավստրիայի խորհրդարանի հայտարարությունները, որոնք պարունակում են ոչ միայն Հայոց ցեղասպանության, այլ նաեւ հարյուր տարի առաջ տեղի ունեցածի համար պատասխանատվության իրենց մասնաբաժնի ճանաչում: Եվ մինչ Գերմանիան եւ Ավստրիան խոսում են պատասխանատվության իրենց բաժնի մասին, Թուրքիան՝ Օսմանյան կայսրության իրավահաջորդը, շարունակում է իր ժխտողական քաղաքականությունը»,- նշել է Նալբանդյանը՝ բարձր գնահատելով Բրազիլիայի Սենատի կողմից ընդունված բանաձեւը։
