Հայաստանը երբեք հարցականի տակ չի դնի Հայոց ցեղասպանության փաստը, դրա միջազգային ճանաչման կարեւորությունը։ Այդ մասին ասել է Հայաստանի արտգործնախարար Էդվարդ Նալբանդյանը բրազիլական «Էստադաո» թերթին տված հարցազրույցում։
Հարցին, թե այս պահին Թուրքիայում քաղաքական փոփոխություններ են ընթանում, կարող է դա որեւէ ազդեցություն ունենալ Հայաստանի հետ հարաբերություններում, ԱԳ նախարարը պատասխանել է. «Գիտեք, մեր նախագահի նախաձեռնությամբ Թուրքիայի հետ մենք սկսեցինք հարաբերությունների կարգավորման շատ կարեւոր մի գործընթաց: Ունեցանք բանակցությունների մի քանի փուլեր եւ համաձայնության եկանք երկու փաստաթղթի շուրջ՝ երկու արձանագրության, որոնք ստորագրվեցին Ցյուրիխում՝ 2009թ. հոկտեմբերի 10-ին։
Սակայն թուրքական կողմը հրաժարվեց վավերացնել եւ կյանքի կոչել այդ երկու արձանագրությունները: Եվ միջազգային հանրության դիրքորոշումը եղել եւ մնում է շատ պարզ, որ գնդակը Թուրքիայի կիսադաշտում է։ Անհրաժեշտ է հարգել միջազգային հարաբերությունների հիմնական pacta sunt servanda սկզբունքը, այն է՝ անհրաժեշտ է հարգել ձեռք բերված համաձայնությունները եւ իրականացնել դրանք։ Թուրքական կողմը հետ քայլ կատարեց։ Ի՞նչ տեղի կունենա ապագայում։ Վստահ եմ, որ վաղ թե ուշ մենք պետք է միասին շրջենք այս էջը...»,- նշել է Նալբանդյանը՝ նկատելով, որ դա հնարավոր կլինի, բայց ոչ ժխտողականության քաղաքականությամբ։ «Շատ հստակ է, որ Հայաստանը երբեք հարցականի տակ չի դնի Հայոց ցեղասպանության փաստը, դրա միջազգային ճանաչման կարեւորությունը։ Տեսե՛ք, թե որքան երկրներ եւ միջազգային կազմակերպություններ են ճանաչել Հայոց ցեղասպանությունը։ Իսկ Թուրքիան ձեւացնում է, թե այն տեղի չի ունեցել, թե դա ցեղասպանություն չէ»:
Նալբանդյանը նաեւ նկատել է, թե Թուրքիան տարիներ շարունակ այդ նույն վարքագիծն է դրսեւորում: