Արգենտինայի ոստիկանությունը հետաքննում է իրավաբանի սպանությունը, որը տեղի է ունեցել սրճարանում՝ բազմաթիվ ականատեսների աչքի առջեւ:
Նախնական տեղեկություններով, փաստաբանին գնդակահարել է իր պաշտպանյալը, որի նկատմամբ հետախուզում էր հայտարարված իր անչափահաս հարազատների նկատմամբ սեռական բռնության մեղադրանքով: Իր փաստաբանին գնդակահարելուց հետո տղամարդն ինքնասպան է եղել Կարիենտես քաղաքի Marta de Bianchetti սրճարանում:
Հանցագործությունը տեղի է ունեցել հուլիսի 1-ին, այն արձանագրել են սրճարանի անվտանգության տեսախցիկները, իսկ տեսանյութը հրապարակել է Diario Chaco պարբերականը:
25 վայրկյան տեւողությամբ տեսանյութում երեւում է, թե ինչպես է փաստաբան Էռնեստո Գոնսալեսը մոտենում սեղանին՝ պատրաստվելով առավոտյան նախաճաշի: Այդ պահին նրան թիկունքից մոտենում է մի տղամարդ՝ ատրճանակը ձեռքին:
Վերջին պահին իրավաբանը փորձել է փախչել, բայց չարագործը 6 գնդակ է արձակել նրա վրա, հետո հանել գլխարկն ու կրակել իր քունքին:
Պարզվել է, որ ինքնասպան եղածը Վալտեր Կառլոս Մարտինեսն է, որի նկատմամբ մայիսին քրեական գործ է հարուցվել: Դատարան են դիմել Մարտինեսի քրոջ երկու դուստրերը՝ 19 եւ 21 տարեկան: Աղջիկները պնդել են, որ իրենց քեռին բռնաբարել է իրենց 2008-2009 թվականներին: Այդ ժամանակ աղջիկներից փոքրը եղել է 12-13 տարեկան: