Ազատության հրապարակում հավաքված էլեկտրաէներգիայի սակագնի բարձրացման դեմ պայքարող քաղաքացին, որը նախորդ օրը ի նշան բողոքի, կարել էր բերանը Երեւանի բնակիչ 28-ամյա Հովհաննես Կարապետյանն է:
Երիտասարդը, որը գիշերել էր Ազատության հրապարակում, NEWS.am-ի հետ զրույցում մի կերպ ասաց, որ բերանը կարած կմնա այնքան ինչքան որ պահանջվի. «Ինչքան պետք ա կմնամ, կարելն էլ կարել եմ այ էս ռեժիմի դեմ»:
Ազատության հրապարակում նախորդ օրվանից հացադուլ սկսած Երեւանի ավագանու «Բարեւ Երեւան» խմբակցության անդամ, ակտիվիստ Դավիթ Սանասարյանը մեզ հետ զրույցում ասաց, որ պետք է ոչ թե բերան կարելով խնդրի լուծման հասնել, այլ վճռական քայլերի դիմել:
«Ես կոչ եմ արել Հովհաննեսին, որ արձակի կարերը, բայց այդ որոշումն իր որոշումն է: Նա այդ կերպ արտահայտում է իր բողոքը իշխանությունների որդեգրած քաղաքականության դեմ»,-ասաց Դավիթ Սանասարյանը:
Ավելի վաղ NEWS.am-ը հաղորդել էր, որ Ազատության հրապարակում ընդդեմ էլեկտրաէներգիայի թանկացման նստացույցի մասնակիցներից մեկը կարել է բերանը։
Հիշեցնենք, որ ոստիկանությունը հուլիսի 6-ին, ոստիկանությունը ցրել է Բաղրամյան պողոտան երկու շաբաթ փակ պահած ցուցարարներին, որոնք ավելի ուշ հավաքվել են Ազատության հրապարակում։ Ցուցարարները ցանկացել են երթ անցկացնել, սակայն ոստիկանությունը թույլ չի տվել: Ցուցարարներից շատերը գիշերել են Ազատության հրապարակում:
