Ազատության հրապարակում նախօրեին հացադուլ սկսած Երեւան» խմբակցության անդամ, ակտիվիստ Դավիթ Սանասարյանի ինքնազգացողությունը լավ է: Այս մասին այսօր` հուլիսի 7-ին, NEWS.am-ի հետ զրույցում ասաց Դավիթ Սանասարյանը` ավելացնելով, որ ինքը հացադուլը կդադարեցնի այն ժամանակ, երբ Ազատության հրապարակում կհավաքվի այնքան զանգված, որոնց հետ հնարավոր կլինի ընդվզել իշխանությունների դեմ:
«Ես առայժմ այստեղ եմ, հացադուլս անժամկետ է: Այստեղ կմնամ այնքան ժամանակ, մինչեւ տեսնեմ բավական զանգված, որոնց հետ առաջին շարքերում կորոշենք` ինչ ենք անելու»,-ասաց նա:
Դավիթ Սանասարյանը նշեց, որ էլելտրաէներգիայի սակագնի բարձրացման դեմ պայքարողները պետք է միավորվեն, քանի որ, ըստ նրա, միայն այդ դեպքում է հնարավոր իշխանություններին ստիպել չեղարկել էլեկտրաէներգիայի սակագնի բարձրացման մասին որոշումը, վերանայել նախկին սակագինը եւ քրեականհ պատասխանատվոեւթյան ենթարկել հունիսի 23-ին հակաօրինական գործողությունների դիմած ոստիկաններին:
Ավելի վաղ NEWS.am-ը հաղորդել էր, որ Դավիթ Սանասարյանը հացադուլ է հայտարարել, որն ուղղված չէ Հայաստանի իշխանություններին,այլ ուղղված է ՀՀ քաղաքացիներին: Նա հայտարարել էր, որ հացադուլը շարունակելու է այնքան ժամանակ, մինչեւ այնքան մարդ հավաքվի Ազատության հրապարակում, որ Բաղրամյան 26 շարժվելուց կարողանան դիմագրավել ոստիկանական պատնեշին:
Հիշեցնենք, որ ոստիկանությունը հուլիսի 6-ին, ոստիկանությունը ցրել է Բաղրամյան պողոտան երկու շաբաթ փակ պահած ցուցարարներին, որոնք ավելի ուշ հավաքվել են Ազատության հրապարակում։ Ցուցարարները ցանկացել էին երթ անցկացնել, սակայն ոստիկանությունը չէր թույլատրել: Ցուցարարներից շատերը գիշերել են Ազատության հրապարակում: