Երեւանում հուլիսի 6-ին տեղի է ունեցել համաժողով՝ «Տարեկան պետական բյուջեի կատարողականի եզրակացության բարելավում» թեմայով, որին մասնակցել են ՀՀ Վերահսկիչ պալատի ղեկավար անձնակազմը՝ ՎՊ նախագահ Իշխան Զաքարյանի գլխավորությամբ, Գերմանիայի Միջազգային Համագործակցության Ընկերության եւ ԵՄ պատվիրակության ներկայացուցիչները:
Քննարկմանը բացման խոսքով հանդես է եկել ՀՀ ՎՊ նախագահ Իշխան Զաքարյանը: «ՀՀ Վերահսկիչ պալատում արդեն մի քանի տարի է՝ բարեփոխումներ են իրականացվում, առ այսօր կատարվել է հսկա աշխատանք: Պատահական չէ, որ մի շարք հեղինակավոր միջազգային կառույցներ, ուսումնասիրելով ՀՀ պետական բարձրագույն իշխանության մարմինների աշխատանքը, ՀՀ Վերահսկիչ պալատի գործունեությանը տվել են ամենաբարձր գնահատականները: Սակայն դա չի նշանակում, որ ամեն ինչ իդեալական է, եւ խնդիրներ չկան: Վերահսկիչ պալատը պետք է դառնա կանխարգելիչ օղակ, եւ աշխատելով օպերատիվ վերահսկողության ռեժիմով՝ պետք է առավելագույնս արդյունավետ իրականացնի իր գործունեությունը: Այսօր գրեթե բոլոր երկրներում պետական բյուջեն 100 տոկոսով ենթարկվում է աուդիտի, եւ բյուջեի կատարողականի վերաբերյալ հաշվետվությունը չպետք է լինի առանց աուդիտի եզրակացության: Այդ նպատակով էլ ներկայումս ուսումնասիրում ենք մի շարք երկրների բարձրագույն վերահսկիչ մարմինների մոդելները:
Այսօր ՀՀ Վերահսկիչ պալատն ունի ֆինանսական աուդիտ իրականացնելու INTOSAI սկզբունքներին համապատասխան ժամանակակից գործիքակազմ»,- նշեց պարոն Զաքարյանը:
ՎՊ եվրոպացի գործընկերները շնորհակալություն հայտնեցին տվյալ աշխատանքային քննարկմանը մասնակցելու հրավերքի համար եւ նշեցին, որ պատրաստ են շարունակել համագործակցությունը ՀՀ Վերահսկիչ պալատի հետ:
Համաժողովի արդյունքում բանախոսներն ու քննարկման մասնակիցները հաստատեցին մի շարք կարեւոր դրույթներ.
• Պետական բյուջեի կատարողականի հաշվետվության վերաբերյալ Վերահսկիչ պալատի եզրակացությունը պետք է հիմնված լինի բացառապես ֆինանսական եւ համապատասխանության վերահսկողության հիման վրա:
• Ներկայումս աուդիտի անցման հետ կապված առկա են մի քանի թյուրըմբռնումներ. առաջինը վերաբերում է ստուգում վերահսկողության ձեւին: Այն խոսակցությունները, որ աուդիտի անցման դեպքում ստուգում այլեւս չի արվելու՝ թյուրիմացություն է: Ստուգում ձեւի կիրառումն աուդիտի մեթոդով վերահսկողության հիմնական գործիքներից է: Երկրորդ՝ առկա է աուդիտի անցնելու հրամայական, եւ որ այն սարերի հետեւում չէ, այլ մոտ ապագայի գործ է:
• Շատ անելիքներ կան նաեւ օրենսդրական բարեփոխումների հետ կապված: Հատկապես, պետք է ՀՀ օրենսդրությունը համապատասխանեցնել ԻՆՏՈՍԱԻ ստանդարտներով պայմանավորված պահանջներին:
Ամփոփելով քննարկումը` բանախոսները փաստեցին, որ աուդիտի մեթոդով վերահսկողության անցման ներկայացված ծրագիրը իրատեսական է, եւ ՀՀ ՎՊ-ն այն հաջողությամբ կարող է իրականացնել: