Երեւանում հուլիսի 5-12-ին կայանալիք «Ցեղասպանագետների միջազգային ընկերակցության» համաժողովի ժամանակ, որի թեման է «20-րդ դարի ցեղասպանությունների համեմատական վերլուծությունը», գիտնականները իրենց զեկույցների հիմքում դրել են տարբեր ցեղասպանությունների միջեւ առկա տարբերություններն ու նմանությունները: Այս մասին այսօր՝ հուլիսի 7-ին, մամուլի ասուլիսում նշել է Ցեղասպանության թանգարան ինստիտուտի փոխտնօրեն Սուրեն Մանուկյանը:
Նա ընթերցել է զեկույցներից մի քանիսի վերնագրերը, օրինակ՝ «Ժխտման քաղաքականությունը», «Կանանց դերը որպես ցեղասպանության զոհեր», «Գաղափարախոսություն եւ ցեղասպանություն», «Սպանության տեսակները ցեղասպանության ժամանակ», «Վերապրածները եւ ցեղասպանության հիշողությունը» «Մշակութային ցեղասպանություն»:
Ցեղասպանության թանգարան ինստիտուտի տնօրեն Հայկ Դեմոյանի խոսքով, եթե նախկինում նման համաժողովներում ներկայացվում էր Հայոց ցեղասպանության վերաբերյալ 4-5 զեկույց, այս տարի դրանց թիվը անցնում է 20-ից:
