Տավուշի մարզի Մովսես գյուղում փետրվարի 4-ին ադրբեջանցի դիպուկահարի կրակոցից վիրավորված 85-ամյա Լեւոն Անդրեասյանի բուժման ծախսերը փոխհատուցել է «Գրանդ տոբակո» ձեռնարկության տնօրեն Միքայել Վարդանյանը: Այս մասին NEWS.am-ին ասաց Անդրեասյանի հարսը՝ Ասմարիկ Աթոյանը:

«Պապիկին բուժում էր անհրաժեշտ, հիվանդանոցում պետպատվեր չէին տրամադրում, բայց Միքայել Վարդանյանը 220 հազար դրամ փոխհատուցեց, պապիկը բուժումը ստացավ եւ մեկնեց գյուղ»,-ասաց նա:

Տիկին Ասմարիկը նշեց, որ իրենք չեն դիմել «Գրանդ տոբակոյի» տնօրենին, այլ Մովսես գյուղից աշխատող է եղել ձեռնարկությունում, վերջինս է դիմել, Միքայել Վարդանյանն էլ չի հրաժարվել օգնել. «Տնօրենն ասել է, որ ինչ հարց էլ լինի պապիկի հետ կապված, կօգնենք»: 

Ավելի վաղ հաղորդել էինք, որ Անդրեասյանի հարազատները դիմել են առողջապահության նախարարությանը՝ բուժումը պետպատվերի շրջանակում իրականացնելու համար, սակայն պատասխան են ստացել, թե այդ դեպքում պետպատվեր չի հասնում:

NEWS.am-ի թղթակցին «Արմենիա» ԲԿ-ից հայտնեցին, որ Անդրեասյանի համար պետպատվերի հիմք չի եղել, այդ պատճառով պետք է վճարումը կատարեն:

Նշենք, որ Լեւոն Անդրեասյանը ստացել էր ծնկի եւ ոտքի ազդրոսկրի կոտրվածք: Մի քանի շաբաթ Կենտրոնական զինվորական կլինիկական հոսպիտալում բուժում ստանալուց հետո նա դուրս էր գրվել եւ մեկնել Մովսես գյուղ:

Հիշեցնենք, որ 85-ամյա ծերունուն հրազենային վնասվածքը ստացել էր փետրվարի 4-ին այգում աշխատելու ընթացքում: Փաստի առթիվ հարուցվել է քրեական գործ: