Renault ընկերությունը՝ Alpine ապրանքանիշի վերստեղծման նախագծի նախաձեռնողը, բավականաչափ հզոր եւ ժամանակակից շարժիչներ ունի: Սակայն ապագա երկտեղանոց սպորտային ավտոմեքենան, որով Alpine-ը պետք է շուկա վերադառնա, դրանցից ոչ մեկը չի ունենա:
Ավելի վաղ ենթադրվում էր, որ մեքենան կա՛մ Megane RS-ից 2 լիտրանով տուրբոշարժիչ կունենա, կա՛մ Clio հեչբեկի 1.6 լիտրանոց շարժիչ: Սակայն, Auto Evolution կայքի տեղեկություններով, Renault-ում որոշել են Alpine-ի վերածննդի առիթով նոր շարժիչ ստեղծել:
Ըստ Vesti-ի, Renault-ի եւ Nissan-ի ինժեներների մշակած 1.8 լիտրանոց նոր տուրբոշարժիչը կառաջարկվի երեք տարբերակով՝ 250, 275 եւ 300 ձիաուժ հզորությամբ:
Սակայն Renault-Nissan-ում հաշվարկել են, որ միայն մեկ մոդելի համար նոր շարժիչ ստեղծելն այնքան էլ նպատակահարմար չէ: Ալյանսն արդեն մտորում է, թե ինչ ավտոմեքենաներ կարող են այն ունենալ: Թեկնածուների թվում են նոր սերնդի Megane RS-ը, Nissan Pulsar Nismo-ն եւ այլն:
