Ազատության հրապարակում արդեն 2-րդ օրն է՝ շարունակվում է էլեկտրաէներգիայի սակագնի բարձրացման դեմ նստացույցը: NEWS.am-ի թղթակիցը հաղորդում է, որ Ազատության հրապարակում մարդաշատ չէ:
Ավագանու «Բարեւ Երեւան» խմբակցության անդամ Դավիթ Սանասարյանն այսօր միայնակ է հացադուլ անում Ազատության հրապարակում: Նրա խոսքով`մարդկանց սակավաթիվ լինելը պայմանավորված է նրանով, որ բոլորը սպասում են հինգշաբթի օրը կայանալիք հավաքին:
«Հինգշաբթի օրը մարդիկ կարձագանքեն եւ միասին կորոշենք մեր քայլերը: Քանի որ օր է նշանակված, հինգշաբթի 19:00-ին մարդիկ կլինեն այստեղ, սա ընթացակարգային է, դրա համար մարդիկ սակավաթիվ են»,-ասաց նա:
Դավիթ Սանասարյանի խոսքով`իրենք պետք է քայլ առ քայլ հասնեն նախագահի հրաժարականին:
«Հրաժարականի պահանջը լեգիտիմ է, բայց քայլ առ քայլ հասնենք, ոչ թե ասենք Սերժ Սարգսյանի հրաժարական եւ ոչ մի բան չանենք, ես կարծում եմ, որ մենք միասին պետք է ոստիկանների հետ քայլենք առաջ, ունենանք նոր Հայաստան, որտեղ ոստիկաները լինելու են օրենքի դաշտում եւ կառավարական պաշտոններ զբաղեցնող անձինք արտոնյալներ չեն լինելու»,-ասաց նա:
Դավիթ Սանասարյանը նշեց, որ հացադուլին որոշ բլոգերներ բացասական են արձագանքել:
Նա կոչ արեց բլոգերներին իրեն ծաղրելու փոխարեն իշխանությունններին ծաղրել եւ քայլեր ձեռնարկել, ոչ թե ժամանակ ծախսել եւ իրեն քննդատեն:
Հիշեցնենք, որ ոստիկանությունը հուլիսի 6-ին, ոստիկանությունը ցրել է Բաղրամյան պողոտան երկու շաբաթ փակ պահած ցուցարարներին, որոնք ավելի ուշ հավաքվել են Ազատության հրապարակում։ Ցուցարարները ցանկացել էին երթ անցկացնել, սակայն ոստիկանությունը չէր թույլատրել: Ցուցարարներից շատերը գիշերել են Ազատության հրապարակում: