Freedom House միջազգային իրավապաշտպան կազմակերպությունը դիմել է Բաքվում օտարերկրյա դիվանագետներին՝ կոչ անելով մասնակցել Ադրբեջանում քաղբանտրակյալների դատավարություններին:
«Կոչ ենք անում ԱՄՆ-ին եւ մյուս երկրներին՝ իրենց դեսպաններին կամ այլ բարձրաստիճան դիվանագետներին ուղարկել մասնակցելու Ադրբեջանում իրավապաշտպանների նկատմամբ ընթացող դատական գործընթացներին»,-ասել է կազմակերպության ղեկավար Մարկ Լագոնը, հաղորդում է contact.az-ը:
«Դեսպան Ռոբերթ Սեքութան եւ մյուս դեսպանները կարող են լուրջ աջակցություն ցուցաբերել Ադրբեջանի իրավապաշտպաններին՝ մասնակցելով այդ քաղաքական գործընթացներին: Մենք նաեւ կոչ ենք անում ԱՄՆ-ին եւ մյուս երկրներին դատապարտել այդ գործընթացները՝ դրանց կեղծավոր, քաղաքական բնույթի համար, որոնք խեղդում են այլակարծությունն Ադրբեջանում եւ թաքցնում կառավարության կոռուպցիան:
Քաղբանտարկյալների նկատմամբ մեղադրանքները պետք է հանվեն, եւ նրանք բոլորը պետք է ազատ արձակվեն»,-ասված է հայտարարությունում: