Կարելի է 100 տոկոսով լուրջ զարգացում սպասել Հայաստանի հետ հարաբերություններում: Այս մասին NEWS.am-ի թղթակցի հետ զրույցում նշել է Հայաստանում Իրանի դեսպան Մոհամադ Ռեյիսին՝ պատասխանելով հարցին, թե ինչ արդյունք կարող է տալ հուլիսի 14-ին Վիեննայում Իրանի եւ «վեցնյակի» միջեւ ձեռք բերված համաձայնագիրը:
Նրա խոսքով, Իրանի շրջափակման վերաբերյալ բոլոր որոշումների վերացումը կպահանջի 6-7 ամիս: Առայժմ չեղյալ են հայտարարվում Իրանի դեմ ընդունված ՄԱԿ-ի բանաձեւերը: «Հույս ունենք, որ մնացած նմանատիպ որոշումներն աստիճանաբար չեղյալ կհայտարարվեն: Վստահ եղեք, որ մեր երկիրը ոչ քիչ առավելություններ ունի, որոնք մենք ուզում ենք առաջարկել մեր հարեւանների հետ հարաբերություններում: Հայաստանի հետ մենք շատ լավ հարաբերություններ ունենք, եւ ոչ մի սահմանափակում դրանց զարգացման համար չկա»,-ասել է իրանցի դիվանագետը:
Հիշեցնենք, որ ըստ Իրանի եւ «վեցնյակի» միջեւ ձեռք բերված համաձայնագրի, Իրանը պարտավորվում է կտրուկ նվազեցնել ցածր հարստացված ուրանի պաշարները, ինչպես նաեւ վերակառուցել Ֆորդոուի ստորգետնյա հարստացուցիչ գործարանը եւ Արաքի ծանր ջրի ռեակտորը, որպեսզի բացառի ռազմական նպատակներով միջուկային նյութերի ստացումը:
Փոխարենը Եվրամիությունը կդադարեցնի նավթային էմբարգոն եւ բանկային պատժամիջոցները: Իրանին հասանելի կլինի նաեւ Swift էլեկտրոնային բանկային համակարգը: Առեւտրային եւ ֆինանսական պատժամիջոցները կդադարեցնի նաեւ ԱՄՆ-ն: