Տուրիստական խարդախությունների մակարդակով Եվրոպայի վատագույն երկրների ցանկում Հայաստանն ու Կիպրոսը կիսում են 9-րդ տեղը: Յուրաքանչյուր երկրում բրիտանացիների 4.4%-ը տուրիստական խարդախության զոհ է դարձել: Այս մասին գրում է «The Telegraph»-ը:
Մեծ Բրիտանիայում անցկացված նոր հետազոտության համաձայն, տուրիստական խարդախության առումով Իսպանիան վատագույն երկիրն է: Անցյալ տարի այս երկիր այցելած հինգ բրիտանացուց առնվազն մեկն այստեղ իրավախախտման զոհ է դարձել, օրինակ՝ գրպանահատների կամ տաքսիստների կողմից:
Վարկանիշի 2-րդ հորիզոնականում Ֆրանսիան է. այստեղ խարդախության զոհ է դարձել բրիտանացիների 15%-ը: 3-րդ տեղում Իտալիան է՝ 10%-ով, 4-րդում՝ Թուրքիան՝ ավելի քան 8%-ով: Ինքը՝ Մեծ Բրիտանիան, ավելի քան 5%-ով 8-րդ տեղում է:
Խարդախություն ասելով հետազոտության հեղինակները նկատի ունեն գողությունը, գրպանահատությունը, հյուրանոց ժամանելիս թաքցրած տուրիստական հարկ պահանջելը, ավտոմեքենաների վարձույթի շատ բարձր գինը, համառ փողոցային առեւտրականներին, բարձր գին պահանջող տաքսիստներին, փողոցային հանցավորությունը: