Թուրքիայի իշխանությունները պատրաստ են ԱՄՆ-ին տրամադրել իրենց ռազմաօդային բազաներից մեկը՝ ծայրահեղական «Իսլամական Պետություն» խմբավորմանը հարվածներ հասցնելու համար: Այդ մասին հաղորդել են մի քանի ամերիկացի պաշտոնյաներ, որոնք չեն ցանկացել նշել իրենց անունը, քանի որ համաձայնագիրը դեռ պետք է պաշտոնապես ստորագրվի:
Նման համագործակցության վերաբերյալ պայմանավորվածությունը վերջնականապես ձեռք է բերվել ԱՄՆ նախագահ Բարաք Օբամայի եւ նրա թուրք գործընկեր Ռեջեփ Թայիփ Էրդողանի միջեւ չորեքշաբթի տեղի ունեցած հեռախոսային զրույցի ընթացքում, հաղորդում է աղբյուրը:
Խոսքը կարող է վերաբերել «Ինջիրլիք» ռազմակայանին, որը գտնվում է Սիրիայի սահմանի հարեւանությամբ, հաղորդում է BBC-ին:
Չորեքշաբթի թուրք-սիրիական սահմանին բախում է տեղի ունեցել թուրքական բանակի եւ «Իսլամական պետության» ուժերի միջեւ, իսկ շաբաթվա սկզբում թուրքական Սուրուչ քաղաքում պայթյունի հետեւանքով 32 մարդ էր զոհվել: Տեղի ունեցածի պատասխանատվությունն Անկարան դրել է ԻՊ-ի վրա: