Տավուշի մարզի Աչաջուր համայնքի ղեկավար Կամո Ղալթախչյանը պնդում է, որ Իջեւանի ոստիկանապետ Արթուր Եգանյանի դեմ որեւէ բողոք չի ներկայացրել, հետեւաբար նրա ձերբակալության հետ որեւէ առնչություն չունի:
«Իմ դեմ մահափորձ են կատարել, որդուս դեմ մահափորձ են կատարել, բայց մենք ոչ մեկի դեմ չենք բողոքել, ընդհանրապես ոստիկանություն չենք դիմել: Արթուր Եգանյանի ձերբակալության հետ առնչություն չունենք: Ես գրավոր էլ եմ ոստիկանությունում դիմում ներկայացրել, որ բողոք չունեմ»,- NEWS.am-ի թղթակցին ասաց գյուղապետը:
Նշենք, որ ըստ ՀՔԾ հաղորդագրության՝ 2013թ. սեպտեմբերի 22-ին Տավուշի մարզի Աչաջուր գյուղի բնակիչ Կամո Ղալթախչյանի դեմ սպանության փորձից հետո վերջինս հայտարարել է, որ հիշյալ դեպքից շուրջ 6 ամիս առաջ դարձյալ նույն գյուղում ինքնաձիգի կրակահերթեր են արձակվել՝ այդ անգամ որդու վարած ավտոմեքենայի ուղղությամբ: Նախաքննությամբ պարզվել է, որ հիշյալ ժամանակահատվածում ոստիկանության Իջեւանի բաժնի պետ Արթուր Եգանյանը տեղեկացված է եղել դեպքի մասին, սակայն առանձնապես ծանր հանցագործության դեպքը սահմանված կարգով չի հաշվառել, որի հետեւանքով դեպքի առթիվ նախապատրաստված նյութերը օրինական ընթացք չեն ստացել:
Հիշեցնենք, որ Աչաջուրի գյուղապետ Կամո Ղալթախչյանի դեմ սպանության փորձը կատարվել է 2013թ.-ին, իսկ գործով ձերբակալված անձն էլ քննիչներին հայտնել է, որ գյուղապետն ու մի շարք անձինք իրեն առեւանգել են եւ ստիպել, որ սպանության փորձն իր վրա վերցնի: Առեւանգման փաստի առթիվ հարուցված քրգործի շրջանակներում կալանավորվել է գյուղապետի որդին: