Գեղարքունիքի մարզի Վարդենիկ համայնքի բնակիչ Սեւակ Մ.-ն մեղադրվում է անչափահաս դստերը ծեծի ենթարկելու մեջ: Այս մասին NEWS.am-ը տեղեկացավ Դատական տեղեկատվական համակարգից:
Ըստ մեղադրական եզրակացության՝ Սեւակը մարտի 21-ին իրենց տան բակում վիճել է անչափահաս դստեր հետ: Այնուհետեւ հայրը բռունցքներով հարվածել է դստեր դեմքին, ինչի հետեւանքով վերջինս վայր է ընկել գետնին։ Գետնին ընկած ժամանակ հայրը ոտքերով հարվածել է դստեր գոտկատեղին եւ ոտքերի շրջանին՝ պատճառելով առողջության թեթեւ վնաս, առողջության կարճատեւ քայքայումով։
Սեւակ Մխիթարյանին մեղադրանք է առաջադրվել Քրեական օրենսգրքի 117-րդ հոդվածի հատկանիշներով: Խափանման միջոց է ընտրվել ստորագրություն չհեռանալու մասին:
Գործը քննվում է Գեղարքունիքի մարզի ընդհանուր իրավասության դատարանում:
