Առնվազն 120 խաղաղ բնակիչներ զոհվել, եւս 150-ը վիրավորվել են Եմենի հարավ-արեւմուտքում, Թաիզ նահանգում Սաուդյան Արաբիայի գլխավորած արաբական կոալիցիայի ավիահարվածներից։ Այդ մասին հաղորդում է Associated Press-ը՝ վկայակոչելով անվտանգության ծառայությանն ու ականատեսներին։

Ինքնաթիռները հարված են հասցրել Մոխա քաղաքի բնակելի թաղամասին։ Հարվածների հետեւանքով բնակելի տների զգալի մասը ոչնչացվել է, հրդեհ է բռնկվել։ Տուժածներին տեղափոխել են հիվանդանոց, հայտնում է «ՌԻԱ Նովոստին»։

Եմենում շարունակվում է զինված ընդհարումը, իրար հետ կռվում են մի կողմից ապստամբ հուսիթները «Անսար Ալլա» խմբավորումից եւ նախկին նախագահ Ալի Աբդալլահ Սալեհին հավատարիմ ուժերը, մյուս կողմից տապալված նախագահ Աբդ Րաբբու Մանսուր Հադիի զորքերը։