Հայկական ԱԷԿ-ի 1-ին բլոկը հարկավոր է վերջնականապես փակել: Այս մասին NEWS.am-ի թղթակցի հետ զրույցում հայտարարեց «Արմատոմ ԳՀԻ» գլխավոր տնօրեն Վահրամ Պետրոսյանը:
Քանի որ երկրի ատոմային էներգետիկայի օրակարգի գլխավոր խնդիրը շարունակում է մնալ նոր էներգաբլոկի կառուցումը, առաջին էներգաբլոկի շուրջ ակտիվ քննարկումներ չեն տարվում:
«Բայց ապագայում այդ հարցը, հնարավոր է, դիտարկվի, քանի որ ներկայում առաջին էներգաբլոկը, այսպես ասած, սառեցված ռեժիմում է: Իսկ դրա ամբողջական փակման համար լրացուցիչ աշխատանքներ են անհրաժեշտ»,- հայտարարեց Պետրոսյանը:
Հիշեցնենք, որ Սպիտակի երկրաշարժից հետո՝ 1989 թվականի փետրվար-մարտին, Հայկական ԱԷԿ-ի երկու էներգաբլոկներն էլ կանգնեցվեցին: Առաջին բլոկի շոգեգեներատորի մասնաշենքից մետաղի նմուշներ վերցրեցին: Դրանից հետո՝ 1995 թվականի նոյեմբերին, սկսեց գործել միայն 2-րդ էներգաբլոկը:
