Չնայած մի շարք բարեփոխումների անցկացմանն ու պարտավորությունների կատարմանը՝ Վրաստանը մինչեւ հիմա Արեւմուտքից «հստակ պատասխան» չի ստացել ՆԱՏՕ-ին անդամակցության հնարավորության մասին: Եթե Վրաստանը ՆԱՏՕ-ում չընդգրկվի, դա «ողբերգություն» կլինի: Այս մասին ավստրիական Kurier-ին տված հարցազրույցում հայտարարել է Վրաստանի պաշտպանության նախարար Թինաթին Խիդաշելին:
Նրա կարծիքով, Ուկրաինայում իրադարձությունների զարգացումը «լավատեսության առիթ չի տալիս»: Ռուսաստանի կողմից մարտահրավերները ոչ թե Թբիլիսիի, Կիեւի, Բաքվի կամ Երեւանի դեմ են, այլ Վաշինգտոնի, Բրյուսելի եւ ընդհանրապես Արեւմուտքի:
Խիդաշելիի խոսքով, Վրաստանի կողմից տեխնիկական աշխատանքն իրականացվել է, մնում է միայն Վրաստանին ՆԱՏՕ-ի անդամության Գործողությունների ծրագրում, հեռանկարում՝ նաեւ հենց Դաշինքում ներառելու մասին «քաղաքական որոշում կայացնել»:
Նախարարը համոզված է, որ եթե Վրաստանին ընդգրկեն ՆԱՏՕ-ի Գործողությունների ծրագրում, դա կամրապնդի երկիրը: «Իսկ եթե դա տեղի չունենա, Վրաստանի վերջ չի նշանակի, բայց ողբերգություն կլինի»,- ամփոփել է Խիդաշելին: