Լոռու մարզի Վարդաբլուր գյուղում հուլիսի 26-ին 67-ամյա Սոս Վ.-ն խոտ հնձելիս է տրակտորով ձորն ընկել եւ մահացել: Այս մասին NEWS.am-ի թղթակցին ասաց համայնքի ղեկավար Միքայել Ֆրանգյանը, որի համագյուղացին է մահացած վարորդը:
«Այս պահին հայտնի չէ, թե ինչպես է տրակտորը հայտնվել ձորում: Կարող է նաեւ ինքնազգացողությունն է վատացել, չենք կարող ասել»,- ասաց գյուղապետը:
Նրա խոսքով՝ մահացած տղամարդն անձնական տրակտորով գյուղացիների համար խոտ էր հնձում, հող վարում եւ այդ կերպ գումար վաստակում:
«Սոսի որդիները մեծ են, թոռներն արդեն ուսանողներ են»,- ավելացրեց Միքայել Ֆրանգյանը:
Ավելի վաղ ՏԿԱԻՆ մամուլի ծառայությունը հաղորդել էր, որ հուլիսի 26-ին, ժամը 21.12-ին Լոռու մարզի Վարդաբլուր գյուղի հյուսիսային հատվածում «Բելառուս» մակնիշի տրակտորը դուրս է եկել դաշտամիջյան ճանապարհից եւ շրջվել հարակից ձորը: Հուլիսի 27-ին վաղ առավոտյան փրկարարները հայտնաբերել են տրակտորի վարորդի՝ 67-ամյա Սոս Վ.-ի դին: