ԱՄՆ Ֆրեզնո քաղաքում պղծել են Հայոց ցեղասպանության զոհերի հիշատակին նվիրված հուշարձանը, որը բացվել էր ընդամենը 3 ամիս առաջ։ Այս մասին հայտնում է The Fresno Bee կայքը։
Ֆրեզնոյում Հայաստանի պատվո հյուպատոս Պերճ Աբգարյանի խոսքով՝ հուլիսի 24-ին ինչ-որ մեկը պոկել է հուշարձանի մի աղյուսը։ Քաղաքային իշխանությունների ներկայացուցչի փոխանցմամբ իրենք հետաքննում են միջադեպը։ Նա հայտնել է, որ մետաղյա վահանակը վնասել են, սակայն չեն տարել։ Ֆրեզնոյի իշխանություններն այն կվերականգնեն այս շաբաթ։
«Այդ աղյուսի հետ շատ պատմություններ են կապված։ Դրանք սրտահույզ են, եւ ես բավական հիասթափված եմ։ Հանցագործությունը կատարվել է ատելության հողի վրա։ Սրան պետք է շատ լուրջ վերաբերվել, եւ նման բան չի կարելի հանդուրժել»,- ընդգծել է Պերճ Աբգարյանը։ Պատվո հյուպատոսը հավելել է, որ հուշարձանը բացվել էր այս տարվա ապրիլին՝ Հայոց ցեղասպանության 100-ամյակի կապակցությամբ։ Աբգարյանը քաղաքի ոստիկանության եւ ղեկավար մարմինների հետ կաշխատի վանդալիզմի հեղինակներին բացահայտելու համար։
Ֆրեզնոյի քաղաքապետ Ջոզեֆ Կաստրոն իր հերթին նշել է, որ ցավում է Հայոց ցեղասպանությանը նվիրված գեղեցիկ հուշաքարի նկատմամբ վանդալիզմի վերջին ակտի կապակցությամբ։ «Ես խնդրել եմ համայնքի ներկայացուցիչներին միավորվել՝ մեր պատմական հուշաքարի պաշտպանության համար,- ասել է Կաստրոն,- տուֆից պատրաստված հուշարձանը հայ ազգի մշակույթի խորհրդանիշն է»։
Հուշարձանը կառուցված է Երեւանի «Ծիծեռնակաբերդ» հուշահամալիրի նմանությամբ։ 9 սյուները խորհրդանշում են պատմական Հայաստանի 6 նահանգները, Կիլիկիան, Սփյուռքը եւ Հայաստանի Հանրապետությունը։ Սյուները վերնամասից միավորված են, ինչը խորհրդանշում է, որ Հայոց ցեղասպանությունը թեեւ խորը սպի է թողել, սակայն չի խախտել հայ ազգի միասնականությունը։
