Բանգլադեշի հարավ-արեւելյան Կոկս-Բազար լեռնային շրջանում ավերիչ սողանքների հետեւանքով առնվազն 5 մարդ է զոհվել, ավելի քան 10 հոգի տուժել է: Այս մասին հաղորդում է Սինխուա գործակալությունը:
«Փրկարարներին հաջողվել է 5 մարդու մարմին դուրս բերել, որոնց թվում են 3 կին եւ 6-ամյա մի երեխա»,- գործակալությանը տեղեկացրել է տեղի ոստիկանության ներկայացուցիչը:
Հորդառատ անձրեւների հետեւանքով առաջացած սողանքները սկսվել են կիրակի: Դրանք առնվազն 4 տան փլուզման պատճառ են դարձել: Իշխանությունները փրկարարական գործողություն են իրականացնում բանակի, սահմանային ծառայության աշխատակիցների, հրշեջների եւ ոստիկանների մասնակցությամբ:
Հունիսին երկրի հարավ-արեւելքում հեղեղումների եւ սողանքների զոհ է դարձել 21 մարդ: Եղանակային այդ պայմանները Բանգլադեշում կպահպանվեն մինչեւ սեպտեմբեր: