Երեւան Արաբկիր եւ Քանաքեռ Զեյթուն վարչական շրջանների իրավասության դատարանում այսօր՝ հուլիսի 27-ին, ավարտվել է մոտ երկու ժամ տեւած՝ Սյունիքի մարզպետ Սուրիկ Խաչատրյանի որդու՝ Տիգրան Խաչատրյանի կալանքի միջնորդության քննությունը, դատավորը գնացել է խորհրդակցական սենյակ:
Ինչպես լրագրողների հետ զրույցում նշեց Տիգրան Խաչատրյանի փաստաբան Արմեն Մելքոնյանը, ինքը Տիգրան Խաչատրյանի անմեղությունն ապացուցող բավարար ապացույցներ է ներկայացրել:
«Մեր առարկությունները բավարար էին, հիմնավոր էին ու հիմնված չէին ենթադրության վրա: Եթե դատարանը գտնվի իր բարձրության վրա, պիտի այս միջնորդությունը մերժվի»,- ասաց Արմեն Մելքոնյանը:
Փաստաբանը նշեց, որ գործով միակ վկան, որի ցուցմունքի հիման վրա մեղադրանք է առաջադրվել Տիգրան Խաչատրյանին, ժամկետային զինվորական ծառայությունից հոգեկան հիվանդության պատճառով է ազատվել, ինչի վերաբերյալ ինքը փաստաթղթեր ունի:
Փաստաբանը վստահեցրել է, որ Տիգրան Խաչատրյանի մասին սխալ կարծիք է ձեւավորվել` հիմնվելով միայն այն փաստի վրա, որ նա Սյունիքի մարզպետի որդին է։
«Իմ պաշտպանյալը Գորիսի երկրապահների միության նախագահն է: Այսօր ամեն ինչ կատարվում է նրա համար, որ նրա հայրը Սյունիք մարզպետն է: Եթե հնարավորություն ունենաք Տիգրան Խաչատրյանի հետ զրուցել 10 րոպե, կփոխեք ձեր կարծիքը նրա մասին։ Տիգրան Խաչատրյանը ընտրվեց որպես թիրախ, հասարակության մեջ մի շերտ կա, որ պիտի այդ բավարարումը ստանար»,– ասել է նա:
Փաստաբանը շարունակել է պնդել, որ իր պաշտպանյալը վեճի ժամանակ որեւէ մեկին վնասվածք չի հասցրել, այլ «բաժանել է» վիճաբանողներին։ Հարցին, թե այդ դեպքում ով է վնասվածք հասցնողը` փաստաբանը պատասխանել է. «Եթե մի քիչ էլ խղճներին դեմ չգնան, կպատասխանեն»:
Նշենք, որ այսօր՝ հուլիսի 27-ին, Տիգրան Խաչատրյանին մեղադրանք է առաջադրվել Քրեական օրենսգրքի 112-րդ հոդվածի 1-ին մասով: Դատարանում այս պահին քննվում է Տիգրան Խաչատրյանի խափանման միջոց կալանք ընտրելու քննիչի միջնորդությունը:
Ավելի վաղ Քննչական կոմիտեն հաղորդել էր, որ 2015թ. մայիսի 2-ին՝ ժամը 17:00-ի սահմաններում, տեղի է ունեցել վիճաբանություն՝ դրանից ժամեր առաջ Գորիս քաղաքում տեղի ունեցած ավտովթարի կապակցությամբ, որի հետեւանքով վնասվել էր Մուշեղ Զաքարյանի վարած ավտոմեքենայի կողային հայելին։
Վիճաբանության ժամանակ մի խումբ անձանց կողմից բռնություն է գործադրվել Մուշեղ եւ Հարություն Զաքարյանների նկատմամբ, որի հետեւանքով Մ.Զաքարյանին պատճառվել է միջին ծանրության, իսկ Հ.Զաքարյանին` ծանր մարմնական վնաս:
Կատարված քննչական գործողությունների արդյունքում նախկինում 6 անձ ներգրավվել է որպես մեղադրյալ՝ Մ.Զաքարյանին ծեծելու, միջին ծանրության վնաս պատճառելու համար: