Էլեկտրաէներգիայի թանկացման որոշումը չեղարկել պահանջող «Ոտքի Հայաստան» քաղաքացիական շարժման` Վանաձորից մեկնարկած մարզային իրազեկման երթին այսօր` հուլիսի 27-ին, մասնակցել է ընդամնեը 4-5 մարդ։

NEWS.am-ի թղթակիցը հաղորդում է, որ Արցախի պուրակում, որտեղից մեկնարկել է երթը,   շարժման անդամներին թվով մի քանի անգամ գերազանցող ոստիկաններ կային։ Երթի մասնակիցներն ուղեւորվել են Գյումրի, այնտեղից` Արթիկ, ապա Աշտարակ եւ երեք օր անց կլինեն Երեւանում։  Շարժման խորհրդի անդամ Անդրիաս Ղուկասյանը NEWS.am-ի հետ զրույցում ասաց, որ երթի սակավամարդության պատճառը վանաձորցիների նկատմամբ ճնշումներն են։

«Նախօրեին Վանաձորի Արցախի պուրակում բնակիչների հետ հանդիպմանը պարզ երեւաց, թե որքան մեծ է մեզ սատարող վանաձորցիների թիվը։ Իսկ այսօր մարդիկ երթին չեն միացել, քանի որ սպառնալիքներ են եղել իշխանությունների եւ ոստիկանության կողմից»,– ասաց նա։ Այնուամենայնիվ, Անդրիաս Ղուկասյանը վստահ է, որ մարզային երթի երեք օրերի ընթացքում նրանց թիվը բավական մեծ կլինի։

Նշենք, որ այս պահին Երեւանի Հանրապետության հրապարակում ընթանում է «Ոտքի Հայաստան» շարժման ակցիան։ Ակտիվիստները փորձում են նստացույց սկսել հրապարակում, ինչը ոստիկանները նրանց թույլ չեն տալիս։ Ակտիվիստներն անցորդներին հորդորում են միանալ ընդդեմ էլեկտրաէներգիայի թանկացման իրենց պայքարին։