Արաբկիր եւ Քանաքեռ Զեյթուն վարչական շրջանների ընդհանուր իրավասության դատարանը մի քանի ժամ տեւած խորհրդակցության արդյունքում բավարարել է քննիչի միջնորդությունը եւ երկամսյա կալանք սահմանել Սյունիքի մարզպետ Սուրիկ Խաչատրյանի որդու` Տիգրան Խաչատրյանի նկատմամբ։
Այս մասին լրագրողներին ասաց Տիգրան Խաչատրյանի փաստաբան Արմեն Մելքոնյանը` նշելով, որ դատարանը մերժել է իր բոլոր միջնորդությունները` այդ թվում` գրավի դիմաց իր պաշտպանյալին ազատ արձակելու վերաբերյալ։
Մեկնաբանելով դատարանի որոշումը, փաստաբանն այն անվանեց «Հայաստանի արդարադատության խայտառակ պարտությունը»։
«Մեր փաստարկները հիմնավոր էին: Բողոքարկելու ենք որոշում,ը և հույս ունեմ, որ Վերաքննիչ դատարանը կգտնվի իր բարձրության վրա: Մենք ընդամենը արդարադատություն ենք ուզում, դատարանը հերթական տրաֆարետային որոշումն է արձանագրել, որտեղ նշված է, որ կալանավորում են, քանի որ հնարավոր է, որ Տիգրան Խաչատրյանը խոչընդոտի նախաքննությունը»,– ասաց նա։
Փաստաբանը նաեւ բողոքեց, որ 12 ժամ իր պաշտպանյալին հաց ու ջուր չեն տվել: Նրա խոսքով` Տիգրանը թեեւ «կարողանում է տիրապետել իր հույզերը, պինդ տղա է», սակայն ստեղծված վիճակը «հաճելի չէ», քանի որ Տիգրանն ամուսնացած է, կինը երեխայի է սպասում և «հանկարծ կալանավորում են մի բանի համար, որը չի արել»:
Նշենք, որ տուժող Հարություն Զաքարյանը հայտարարել է, որ հենց Տիգրանն է իր աչքի վնասվածքը հասցրել, ինչից հետո ինքը կորցրել է տեսողությունը։ Տիգրան Խաչատրանը պնդում է, որ ներկա է եղել վեճին, սակայն որեւէ մեկին վնասվածք չի հասցրել, ինքը միայն փորձել է բաժանել վիճողներին։
Ավելի վաղ հաղորդել էինք, որ այսօր՝ հուլիսի 27-ին, Տիգրան Խաչատրյանին մեղադրանք է առաջադրվել Քրեական օրենսգրքի 112-րդ հոդվածի 1-ին մասով: Քննչական կոմիտեն հաղորդել էր, որ 2015թ. մայիսի 2-ին՝ ժամը 17:00-ի սահմաններում, տեղի է ունեցել վիճաբանություն՝ դրանից ժամեր առաջ Գորիս քաղաքում տեղի ունեցած ավտովթարի կապակցությամբ, որի հետեւանքով վնասվել էր Մուշեղ Զաքարյանի վարած ավտոմեքենայի կողային հայելին։
Վիճաբանության ժամանակ մի խումբ անձանց կողմից բռնություն է գործադրվել Մուշեղ եւ Հարություն Զաքարյանների նկատմամբ, որի հետեւանքով Մ.Զաքարյանին պատճառվել է միջին ծանրության, իսկ Հ.Զաքարյանին` ծանր մարմնական վնաս:
