Հանրապետության հրապարակում էլեկտրաէներգիայի թանկացման որոշումը չեղարկելու պահանջով նստացույց հայտարարած «Ոտքի Հայաստան» շարժման անդամներից մի քանիսին եւս մեկ անգամ հաջողվել է ճեղքել ոստիկանական պատը եւ նստացույցը շարունակել հրապարակի գորգի վրա: NEWS.am-ի թղթակցի հետ զրույցում շարժման խորհրդի անդամ Դավիթ Սանասարյանը նշեց, որ ոստիկանները կրկին ակտիվիստներին ուժով դուրս են բերել գորգի վրայից (ֆոտոռեպորտաժ):
«Ոստիկանններին ակտիվ ենք պահում, մենք նստած ենք, իրենք տանջվում են: Ցույց ենք տալիս, որ մենք նստացույցն անցկացնելու ենք գորգի վրա: Եթե կարծում են՝ կխանգարեն մեր ակցիան, ես եմ ասում՝ մեր ակցիան անելու ենք»,- ասաց Դավիթ Սանասարյանը:
Այս պահին Հանրապետության հրապարակում նստացույցի մասնակիցների թիվը շուրջ երեք տասնյակ է: Ըստ Դավիթ Սանասարյանի, գիշերը չեն հեռանալու նստացույցի վայրից, իսկ առավոտյան կշարունակեն հետիոտնի անցումներով անընդհատ հետուառաջ անել՝ այդպիսով խցանում առաջացնելով եւ իրենց բողոքի մասին տեղեկացնելով մարդկանց:
Նշենք, որ շարժման անդամները հուլիսի 27-ի երեկոյան ժամը 18:00-ից փորձում են նստացույց անցկացնել Հանրապետության հրապարակի գորգի վրա: Մեծ թվով ոստիկանական ուժեր են ժամանել հրապարակ եւ պատ կազմել՝ ակտիվիստներին թույլ չտալով մոտենալ գորգին: Այնուամենայնիվ, նրանցից երեքին հաջողվել էր ճեղքել ոստիկանական պատը եւ նստել գորգին: Ոստիկաններն անմիջապես նրանց դուրս էին բերել գորգի վրայից՝ ոտք ու ձեռքից բռնած:
Նշենք, որ շարժումը հայտարարել է, որ հունվարի 27-ից 72-ժամյա նստացույց է սկսում։ Միաժամանակ, Վանաձորից մեկնարկել է շարժման անդամների մարզային երթը, որի մասնակիցներն իրազեկման ակցիաներ կանցկացնեն Գյումրիում, Թալինում, Աշտարակում, ապա կգան մայրաքաղաք։ Էլեկտրաէներգիայի թանկացման դեմ բողոքի առաջին ալիքը նախաձեռնած եւ օրեր շարունակ նույն պահանջով Բաղրամյան պողոտան փակած «Ոչ թալանին» նախաձեռնությունը մերժել է նստացույցին միանալու առաջարկը։
Հիշեցնենք, որ «Ոտքի Հայաստան» նախաձեռնությունը հայտարարել էր, որ եթե ՀԾԿՀ-ն չեղյալ չհայտարարի էլեկտրաէներգիայի սակագնի բարձրացման մասին որոշումը, հուլիսի 27-ից բողոքի ակցիաներ են սկսելու: Նախաձեռնության անդամներն այցելելու են մարզեր, ինչպես նաեւ փողոցներ են փակելու։