Հայաստանի ՏԿԱԻՆ-ում, այսօր՝ հուլիսի 28-ին, ժամը 00.42-ին տեղեկություն է ստացվել, որ Երեւանի Ջրվեժ թաղամասի «Վասպուրական» ռեստորանային համալիրի մոտակայքում գտնվող կամրջից ավտոմեքենան ընկել է ձորը. կա երկու տուժած, որից մեկին (ուղեւորին) չեն կարողանում գտնել. որոնողական աշխատանքներ իրականացնելու համար անհրաժեշտ է փրկարարների օգնությունը:
Դեպքի վայր է մեկնել մեկ մարտական հաշվարկ:
Պարզվել է, որ դեռեւս չբացահայտված հանգամանքներում «Dodge» մակնիշի 05 UL 777 համարանիշի ավտոմեքենան (վարորդ` 42-ամյա Վաղարշակ Հ.) կամրջից (6 մ բարձրություն) ընկել է ձորը: Մեքենան մոտ 50 մետր գլորվել է եւ հայտնվել դաշտում:
Վ. Հ.-ն հոսպիտալացվել է «Գր. Լուսավորիչ» ԲԿ, որտեղ բժիշկները նրա առողջական վիճակը գնահատել են միջին ծանրության. ավտոմեքենայում ուղեւոր չի եղել:
