Հունիս-հուլիս ամիսներին «Հայրիկ Մուրադյան» ՀԿ-ն Լիսաբոն քաղաքում կազմակերպել է հայ ավանդական երգ ու պարի դասընթաց:

Հայաստանի երիտասարդական հիմնադրամի փոխանցմամբ, այն տեղի է ունեցել Գյուլբենկյան հիմնադրամի այգում գտնվող բացօթյա ամֆիթատրոնում։ Միջոցառումն անցկացնելու համար տրամադրվել են անհրաժեշտ ձայնային տեխնիկական սարքավորումներ, որոնց շնորհիվ հայկական երաժշտությունը մի քանի ժամ հնչում էր լիսաբոնյան հրաշալի այգում։

Չնայած Լիսաբոնում հայերը մեծաթիվ չեն, բայց յուրաքանչյուր հայ, ում սրտում ու հոգում կենդանի է հայկական մշակույթը, մասնակցել է կազմակերպված միջոցառմանը։ Մասնակիցները հիմնականում ուսանողներ եւ աշակերտներ էին, ինչպես նաեւ՝ նրանց ծնողները, որոնք անտարբեր չեն հայկական երգ ու պարի հնչյուններին։

Պարերի ուսուցմանը մեծ աջակցություն են ցուցաբերել տեղի մասնագետ Նարե Սուքիասյանը եւ հայկական պարերի լավ գիտակ Լիա Խաչատրյանը։ Երգերի ուսուցումն անցկացրել է «Հայրիկ Մուրադյան» ՀԿ-ի նախագահ, երաժիշտ Նարինե Դելլալյանը։ Որպես կանոն, հայկական խմբին միանում էին օտարազգիներ՝ չինացի, ֆրանսիացի, ամերիկացի, աֆրիկացի, պորտուգալացի։

Բոլոր մասնակիցներին բաժանվել են նաեւ «Մշակութային ժառանգության վերածնունդ» անվանումով տեսա եւ ձայնասկավառակներ, տեղեկատվական գրքույկներ, որոնք թողարկվել եւ լույս են ընծայվել ՀՀ նախագահի աշխատակազմի կողմից հատկացվող դրամաշնորհի եւ Հայաստանի երիտասարդական հիմնադրամի հայտարարած մրցույթի շրջանակներում։

Հիշեցնենք, որ «Հայրիկ Մուրադյան» ՀԿ-ն նախագահական դրամաշնորհի շրջանակներում ազգային երգ ու պարի դասընթացներ է կազմակերպել նաեւ ՀՀ 4 մարզում։ Պարերն ուսուցանել է «Կարին» ավանդական երգ ու պարի համույթը։ Թողարկված ձայնասկավառակում տեղ են գտել Հայրիկ Մուրադյանի կողմից կատարվող 8 երգ, իսկ տեսասկավառակում ներկայացված են 8 ազգագրական պարի կատարում ու ուսուցում՝ իրենց բացատրություններով։ Սկավառակներում տեղադրված տեղեկատվական գրքույկում ամփոփված են երգերի նոտաներն ու բառերը, ինչպես նաեւ՝ ինֆորմացիա՝ ներկայացվող պարերի, դրանք գրառողների մասին։