Կոլումբիայի իշխանությունները մայրաքաղաք Բոգոտայում 330 կգ պայթուցիկ նյութ են առգրավել, որը ենթադրաբար Կոլումբիայի հեղափոխական զինված ուժերի ապստամբները ցանկանում էին օգտագործել հասարակական վայրերում պայթյուններ կազմակերպելու համար։
Կոլումբիայի բանակի հրամանատար Ռաուլ Ռոդրիգեսի խոսքով՝ պայթուցիկ սարքը Բոգոտա էր բերվել երկրի հարավային շրջանից, գրում է «ՌԻԱ Նովոստի»-ն։
Ռոդրիգեսը նշել է, որ մոտ 3 հազար մարդ Բոգոտայում մասնակցում է հակաահաբեկչական գործողություններին։
Նշենք, որ վերջին ժամանակներս Բոգոտայում մի քանի հարձակում էր իրականացվել հասարակական շինությունների վրա, որոնց պատասխանատվությունը երկրի նախագահ Խուան Մանուել Սանտոսը բարդել էր Ազգային ազատագրական բանակի ապստամբների վրա։