«Նաիրիտ գործարանի» հետագա շահագործման, տեխնիկական եւ ֆինանսական կենսունակությանը նվիրված խորհրդարանական լսումներն այսօր՝ հուլիսի 28-ին, դեռ չսկսված ընդհատվեցին:
NEWS.am-ի թղթակիցը հաղորդում է, որ ԱԺ տնտեսական հարցերի մշտական հանձնաժողովի նախագահ Վարդան Այվազյանը եւ Էներգետիկայի եւ բնական պաշարների նախարար Երվանդ Զախարյանը լսումները սկսվելուց մի քանի րոպե անց դուրս եկան դահլիճից եւ բարձրացան ԱԺ նախագահ Գալուստ Սահակյանի սենյակ:
Երվանդ Զախարյանը դիմելով Վարդան Այվազյանին ասաց. «Մենք այսքան ժամանակ հետաձգել ենք սրա համա՞ր»: Նրանք երկուսով վրդովված գնացին ԱԺ նախագահի աշխատասենյակի կողմը:
Դրանից քիչ անց դահլիճից դուրս եկավ նաեւ պատգամավոր Գուրգեն Արսենյանը, ով հայտնեց, որ իր հեռանալու պատճառն այն է, որ ինքը եկել էր լսումների, սակայն սա ընդամենը հանդիպում է, ուստի հեռանում է:
Նշենք, որ խորհրդարանական լսումներին ներկաները շատ չեն: Այստեղ են, մասնավորապես, ՀՀԿ-ական պատգամավորներ Կարինե Աճեմյանը, Վահրամ Մկրտչյանը, Գարեգին Նուշիկյանը, Լեռնիկ Ալեքսանյանը, Մնացական Մնացականյանը, «Ժառանգությունից»` Թևան Պողոսյանը, ԲՀԿ-ից` Գուրգեն Արսենյանը, ՀԱԿ-ից` Ստեփան Դեմիրճյանը, ԲՀԿ-ից` Նաիրա Զոհրաբյանը, Վահե Էնֆիաջյանը:
