Սահմանադրական բարեփոխումների ներկայիս նախագիծն անհրաժեշտ է վերադարձնել այդ բարեփոխումներով զբաղվող Հատուկ հանձնաժողովին։ Այս մասին հուլիսի 28-ին կայացած մամուլի ասուլիսի ժամանակ հայտարարել է Հայաստանի Դեմոկրատական կուսակցության նախագահ Արամ Սարգսյանը։
Նրա համոզմամբ՝ նախագիծը լուրջ խմբագրական փոփոխությունների կարիք ունի։ «Շատ եմ կասկածում, որ Հանձնաժողովի նախագահ Գագիկ Հարությունյանը կարդացել է սա, քանի որ նա դժվար թե իրեն նման բան կարողանա թույլ տալ»,- նշեց Սարգսյանը։
Նա հավելեց, որ սահմանադրական բարեփոխումները պետք է համապատասխանեն երկրում գործող համակարգի տրամաբանությանը։ «Պետք է ուսումնասիրել վրացական փորձը եւ չկրկնել Վրաստանի սխալները։ Քանի դեռ այդ ամենը չի եղել, մենք չենք սկսի փաստաթղթի քննարկումը»,- ընդգծեց Արամ Սարգսյանը։
Անդրադառնալով նախագահի լիազորություններին, Դեմոկրատական կուսակցության նախագահը նշեց, որ նախագահի պաշտոնը «նվաստացվել է»։
«Նախագահը վերածվում է լիազորություններից զուրկ անձի, ով միայն հաստատում է ընդունված որոշումները։ Ի՞նչ է նշանակում «նախագահը հետեւում է Սահմանադրության պահպանմանը»։ Նախագահը կարող է երաշխավորել, որ Սահմանադրությունը չի խախտվի»,- հավելեց Արամ Սարգսյանը։