Իրանի միջուկայի ծրագրի շուրջ համաձայնության ձեռքբերման դեպքում կշահի ամբողջ միջազգային հանրությունը, այլ ոչ թե միայն մեկ երկիր: Հուլիսի 28-ին ամերիկյան Կոնգրեսի Ներկայացուցիչ պալատի արտաքին հարաբերությունների հանձնաժողովում լսումների ժամանակ այս մասին հայտարարել է ԱՄՆ պետքարտուղար Ջոն Քերրին:
Հանձնաժողովի հանրապետական նախագահ Էդ Ռոյսը կարծիք է հայտնել, որ այդ համաձայնագրից կշահի Ռուսաստանը, քանի որ հնարավորություն կունենա առաջ մղել սեփական շահերը:
«Չենք կարծում, որ միայն մեկը հաղթող կլինի»,- ի պատասխան ասել է Քերրին՝ հիշեցնելով, որ խնդրի շուրջ բանակցություններին յոթ երկիր է մասնակցել:
ՌԻԱ Նովոստիի փոխանցմամբ, պետքարտուղարը նաեւ հավելել է. «Մենք չենք զգում, որ ինչ-որ բան ենք կորցնում»: Միաժամանակ, նրա խոսքով, «Իրանը մշտապես լուրջ ճնշման տակ կլինի» այդ համաձայնագրի արդյունքում եւ «պարտավորված կլինի» անհրաժեշտ հաշվետվություններ ներկայացնել:
Հիշեցնենք, որ Իրանն ու միջազգային միջնորդների «վեցյակը» (Ռուսաստան, ԱՄՆ, Չինաստան, Մեծ Բրիտանիա, Ֆրանսիա եւ Գերմանիա) հուլիսի 14-ին Իրանի միջուկային բազմամյա խնդրի շուրջ պատմական համաձայնություն ձեռք բերեցին:
