Ֆլորիդայի նահանգի 23-ամյա բնակիչը մեղադրվում է ԱՄՆ տարածքում ահաբեկչություն իրականացնելու փորձի մեջ:
Հարլեմ Սուարեսին ձերբակալել են հուլիսի 27-ին, որից մեկ օր անց նրան ԱՄՆ տարածքում ռումբ պայթեցնելու փորձի մեղադրանք է առաջադրվել: Քննության տվյալներով, երիտասարդը հայտնվել է «Իսլամական պետություն» խմբավորման ազդեցության տակ եւ ցանկացել է ահաբեկչություն իրականացնել:
«Մեղադրանքի փաստաթղթերի համաձայն, Հարլեմ Սուարեսը ինքնուրույն իրեն հռչակել է ԻՊ-ի համախոհ եւ գիտակցաբար փորձել է զանգվածային ոչնչացման զենք (ռումբ) կիրառել ԱՄՆ տարածքում մարդկանց եւ ունեցվածքի նկատմամբ»,-հայտնել է Ֆլորիդայի գլխավոր դատախազի օգնական Ջոն Քարլինը:
Սուարեսը, որը հայտնի է նաեւ Ալմլաք Բենիտես անունով, իր պլանների մասին պատմել է գաղտնի գործող ՀԴԲ գործակալին: Երիտասարդը համացանցում պայթուցիկը սարքեր պատրաստելու վերաբերյալ նյութեր է որոնել: Ռումբը նա մտադիր էր պայթեցնել Ֆլորիդայի Քի Ուեսթ քաղաքի ծովափերից մեկում:
Այդ նպատակով ահաբեկիչն արդեն ձեռք էր բերել անհրաժեշտ բաղադրիչները եւ պատրաստվում էր ռումբ պատրաստել:
