Լիբիայի խորհրդարանը երկրում համընդհանուր համաներում իրականացնելու վերաբերյալ որոշում է կայացրել, հաղորդում է Afrigatenew պորտալը:
Ըստ փաստաթղթի, համաներումը տարածվելու է այն լիբիացիների վրա, որոնք մեղադրվում են քաղաքական եւ այլ տեսակի հանցագործությունների մեջ, բացառությամբ «ահաբեկչության, թմրանյութերի տարածման, կոռուպցիայի, տարածքների զինված գրավվման», հաղորդում է Gazeta-ն:
Այս որոշումը կայացվել է Լիբիայի նախկին առաջնորդ Մուամար Քադաֆիի որդու՝ Սեյֆ ալ Իսլամի մահապատժի վճռի ֆոնին:
Մի շարք փաստաբանների կարծիքով, այդ դատաքննությունը կրում էր ցուցադրական բնույթ:
Ավելի վաղ NEWS.am-ը հայտնել էր, որ Լիբիայի նախկին առաջնորդ Մուամար Քադաֆիի որդին՝ Սեյֆ ալ Իսլամը գնդակահարության է դատապարտվել: Նա մեղադրվում է պետական անվտանգությունը խախտելու, բանտից փախչելու փորձի եւ ազգային դրոշը պղծելու մեջ: Նշվում է, որ դատարանն արդեն վճիռ է կայացրել Քադաֆիի ժամանակների մի խումբ նախկին պաշտոնյաների նկատմամբ: Տեղեկատվության մեջ ասվում է, որ նրանք մեղավոր են ճանաչվել ռազմական հանցագործությունների եւ 2011 թվականին բողոքի ակցիաները ճնշելիս ցուցարարների սպանությունների համար: