«Ոտքի, Հայաստան» քաղաքացիական շարժման նախաձեռնած էլեկտրաէներգիայի թանկացման դեմ նստացույցի 3-րդ գիշերը Հանրապետության հրապարակում խաղաղ է անցել: Հանրապետության հրապարակում գիշերել են մոտ 20 քաղաքացի: Նստացույցի մասնակիցներին հսկել են մի քան տասնյակ ոստիկաններ, այդ թվում՝ հատուկ ջոկատայիններ: Այս մասին NEWS.am-ին հայտնեց հրապարակում գիշերած Արման Նազարյանը՝ ավելացնելով, որ գիշերը հրապարակում չի տեսել շարժման խորհրդի անդամներին:

«Գիշերը կայֆոտ էլ անցավ, հոգնած էինք, հանգիստ քնեցինք: Ոստիկանները չեն խոչընդոտել նստացույցը»,- ասաց նստացույցի մասնակիցները:

Նստացույցի մասնակիցները հիմնականում երիտասարդներ են: Արման Նազարյանը մեզ հետ զրույցում պատմեց, որ տնից փախել է եւ մասնակցում է նստացույցին, քանի որ հավատում է, որ այդկերպ հնարավոր է հասնել էլեկտրաէներգիայի սակագնի բարձրացման որոշումը չեղարկելուն:

«Տնից փախել, եկել եմ ստեղ, ժողովրդիս համար ամեն ինչ կանեմ»,- ասաց Արմանը:

Այս պահին Հանրապետության հրապարակում են մոտ 6 քաղաքացիներ: Հրապարակում գիշերողները առավոտյան հեռացել են՝ ավելի ուշ վերադառնալու պայմանով:

Նստացույցի մասնակիցներին հսկում են մի քանի տասնյակ ոստիկաններ: Ոստիկանական մեքենաները հեռացվել են Հանրապետության հրապարակից: Դրանք տեղափոխվել են Բյուզանդ փողոցի սկզբնամաս:

Նշենք, որ շարժումը հայտարարել էր, որ հուլիսի 27-ից 72-ժամյա նստացույց է սկսում։ Սակայն ոստիկանությունը նրանց թույլ չի տալիս մոտենալ հրապարակի կենտրոնի գորգին։

Միաժամանակ, Վանաձորից մեկնարկել է շարժման անդամների մարզային երթը, որի մասնակիցներն իրազեկման ակցիաներ կանցկացնեն Գյումրիում, Թալինում, Աշտարակում, ապա կգան մայրաքաղաք։

Հիշեցնենք, որ «Ոտքի Հայաստան» նախաձեռնությունը հայտարարել էր, որ եթե ՀԾԿՀ-ն չեղյալ չհայտարարի էլեկտրաէներգիայի սակագնի բարձրացման մասին որոշումը, հուլիսի 27-ից բողոքի ակցիաներ են սկսելու: Նախաձեռնության անդամներն այցելելու են մարզեր, ինչպես նաեւ փողոցներ են փակելու։